Lezoko Hezkuntza Publikoaren Festa, larunbatean
Herri Eskolak, Institutuak, Haurtxok eta Hezikuntzak elkarlanean antolatu dute egun osorako egitarauarekin festa.
Iazko festako haurren kantaldiaren une bat.Lezo Herri Eskola / Youtube Lezoko Hezkuntza Publikoaren Festa egingo dute larunbatean (hilaren 9an) herrian. Haurtxo haurreskolak, Lezo Herri Eskolak, Lezo Institutuak eta Hezikuntza Guraso Elkarteak mamiz betetako eguna prestatu dute herriko hezkuntza eragile publikoak kalera atera, eta komunitatearekin batera festa eguna ospatzeko.
Goizeko dianaren, krosaren eta Herri Eskolako jolastokian egingo dituzten hasierako ekitaldien ondoren, eguerdi partean eguneko ekitaldirik esanguratsuenak hasiko dira, hala nola ikasleen musika saioak, agurren eta ongietorrien ekitaldia, nahiz haurren eta helduen bazkaria. Tartean, Gure haurrak ere badira Palestinako haurren egoeraz arduratzen den plataformako kideek euren ekarpena egingo dute Herri Eskola ondoko baratzean.
Bazkalostean komunitatean gozatzeko hainbat jarduera, tartean direlarik bingo musikatua eta Euskaraokea. Euskal musikarekin, arratsalde pasa. Horiek bukatuta den-dena jasotzea tokatuko da, hori ere komunitatean egin nahi dute.
- 09:00. Diana.
- 09:20. Krosa.
- 10:00. Herri Eskolako jolastokian, tailerrak, erakusketa eta jolasak.
- 12:15. Herri Eskolako kantxa estalian, haurren musika emanaldia. Jarraian, agurrak eta ongi etorriak.
- Jarraian. Baratzean, Gure haurrak ere badira plataformaren jarduera.
- 14:00. Herri Eskolako kantxa estalian, haurren eta helduen bazkaria: paellada.
- 15:30. Herri Eskolako kantxa estalian, bingo musikatua. Jarraian, Euskaraokea.
- 18:30. Denen artean eskola garbituko dute.
