Itsasertz tabernak ateak irekiko ditu sei urteren ondoren
COVID-19ak eragindako pandemiaren ondorioz, Trintxerpeko Jubilatuen Etxeko tabernak ateak itxi zituen 2020ko martxoan. Inaugurazio ekitaldia hilaren 13an izango da, 18:00etan.
COVID-19ak eragindako pandemiaren ondorioz, Trintxerpeko Jubilatuen Etxeko tabernak ateak itxi zituen 2020ko martxoan. Ordutik, itxita egon da sei urtez, baina udal lizitazio berri bat esker, Itsasertz tabernak ateak irekiko ditu berriz hilaren 13an (asteazkena), 18:00etan. Gune horren irekierarekin, hirugarren adineko bizilagunek topagunerako leku bat berreskuratuko dute.
“Espazio hau berreskuratzea ez da taberna bat berriro irekitzea bakarrik. Auzoari funtsezko topagunea itzultzea da adineko askorentzat, nahi ez den bakardadeari aurre egitea eta Trintxerpeko kohesio soziala eta komunitarioa indartzea. Erakunde publikook komunitatea sortzen duten eguneroko espazioak zaintzeko ardura ere badugu, batez ere erretiratuei lotutakoak, urteetan udalerriko bizitza soziala eta asoziatiboa sostengatu baitute”, adierazi du Teo Alberro Pasaiako alkateak.
Alkateak, gainera, azken urteotan Pasaiako hainbat udal espazio suspertzeko egindako lana balioan jarri nahi izan du: “Itsasertz berriro irekitzea Pasaiako hainbat udal taberna eta kantina berriro martxan jartzeko egiten ari garen ahaleginari gehitu behar zaio; iruditzen baitzaigu ostalaritza negozioak ez ezik, bizikidetzarako, auzo harremanetarako eta komunitate bizitzarako espazioak ere badirela”.
Itsasertz tabernaren aurkezpena irekia izango da, eta Eskola Dantza Taldeak musikarekin eta dantzarekin girotuko du ekitaldia. Pintxoak ere jarriko dituzte bertaratzen direnentzako.
Hilaren 14tik aurrera, honakoa izango da Itsasertz tabernaren ordutegia: asteartetik igandera, 09:00etatik 20:00etara. Eguneko menua ere eskainiko dute egunero, 12:30etik 15:30era. Erreserbak egiteko 674 27 32 42 telefonoa ahalbidetu dute.
