Udaleku Irekietan izena eman daiteke jada
Udalekuak uztailaren 1etik 30era bitartean izango dira. Hilaren 18a da izena emateko azken eguna.
Urtero bezala, Pasaiako Udalak Udaleku Irekiak antolatu ditu udako oporraldirako. Udalekuak Pasaian erroldatuta dauden edo udalerrian ikasten duten 2016 eta 2022 urteen artean jaiotako haurrei begirakoak dira, bi urteak barne. Hau da, Haur Hezkuntzako Lehen Mailatik Lehen Hezkuntzako Laugarren Mailara arteko haurrek har dezakete parte.
Udalekuak uztailaren 1etik 30era bitartean izango dira, astelehenetik ostiralera, 09:30etik 13:00etara. Taldeak adina eta barrutia kontuan hartuta osatuko direla jakinarazi du udalak. Talde bakoitzak begirale bana izango du, eta askotariko jarduerak egingo dituzte: tailerrak, jolasak, eskulanak, txangoak edota irteerak igerilekura eta hondartzara. “Giro alai eta atseginean egingo diren aisialdirako jardueren bidez, herriko haurrek euskaraz eta berdintasunean jolastu eta herriaz gozatzeko aukera izango dute”, adierazi du udalak.
Aurten, eta lehen aldiz, zaintza zerbitzua eskainiko da lau barrutietan, 08:30etik 09:30era bitartean.
Izen emateak
Matrikulazio epea irekita dago jada, eta hilaren 18a (astelehena) izango da izena emateko azken eguna. Aurten 360 plaza daude udalekuetarako, eta izen emateetan zenbateko hori gainditzen bada, zozketa egingo dela aurreratu du udalak. Izen emateak Pasaiako Udalaren webguneko online tramiteen atalean edo HAZ bulegoetan egin behar dira.
Matrikulak 81,81 euroko kostua du, eta zaintza zerbitzuak 65 eurokoa. Hortaz, zaintza zerbitzuan eta udalekuetan izena ematen dutenek 146,81 euro ordaindu beharko dituzte. Ordainketa haurraren izenarekin egin beharko da, ondorengo kontu korrontean: Kutxabank ES55-2095-5400-02-1061652334. Familien errentaren arabera hobariak daudela jakinarazi du udalak.
Izena emateko orriarekin batera honako agiriak aurkeztu beharko dira: ordainagiria, haurraren osasun txartelaren kopia eta nortasun agiriaren edo familia liburuaren kopia.
