Altzate eraikitzeko lanak azken fasean dira
Altzateko hirugarren fasean 60 etxebizitza eta hotela eraiki dira; pasealeku osoa dago zabalik.
Emakume bat Iztieta-Ondartxoko zubia pasatzen, Altzate auzoko etxe berriak atzean dituela.Imanol Saiz Gomez de Segura Altzate eraikitzeko lanak, azken fasean direla jakinarazi du Errenteriako Udalak eta azaldu, hirugarren fasea bukatuta, urrats garrantzitsua eman dela auzo horren eraikuntzan. 2023an hasi zituzten lanak, eta hirugarren fasean, 60 etxebizitza berri eta hotela eraiki dituzte. Gainera, oinezkoentzako zubiaren eraikuntzarekin hasitako Maria Zozaia pasealeke berriaren urbanizazio lanak ere bukatu dituzte.
Hala, Altzate kaleko 11 eta 13 zenbakietako bizilagunek eraikina eraikitzen bukatu ahala giltzak jasotzen joan direla zehaztu du. Hotelak 80 gela ditu eta apirila bukaeran zabaldu zuten.
Urbanizazio lanak bukatuta pasealekua osorik da zabalik; denera 5,4 kilometroko oinezkoen ibilbidea osatu da ibaiaren bueltan Paisaia Planarekin bat eginez. Horrekin batera, 10.000 metro kuadrotik gora berdegune jarri dute erabilgarri, eta gainera, ibaiaren inguruan, 80 metro leheneratu dituzte ezponda profilatuz eta mareen zikloetara egokituta landare espezieak landatuta. Paselaeku berriak bidegorri sarea osatzen duela ere jarri du nabarmen udalak, “800 metroko tarte berria eraikita. Horrela, Arditurriko bide berdearekin eta lezoko udalerriarekin lotuta geratzen da”.
Nabarmentzeko beste arlo bat, Añarbeko uren saneamendu sarean egindako obra: “Garrantzitsua da, ibaiaren ibilgutik kolektore zaharra kentzeaz gain, Altamirako eta Lezoko Jaizkibel kaleko isurketak zuzentzea ahalbidetuko du”. Horren bidez, uraren kalitatea hobetu dute, Oiartzun ibaian eta Pasaiako badian ere.
Aurreikusitako plangintzaren arabera egiten ari dela industria lursailaren berroneratzea gaineratu du udalak, eta gogora ekarri, Ahotsa eta Musikaren Etxea ekipamendu berria eta aparkalekuentzako eraikuntza berria izango dituela espazioak: “Parking berri hori eraikiko den lursaila behin behinean OTA aparkaleku gisa egokituko da hurrengo egunetan, ibilgailuentzako 56 plazarekin”.
