Elkartasun kroketa artean, hegan eta irriz
Markelen Irria eta Juneren Hegoak elkarteek Hegan eta Irriz Kroketa Jaia antolatu dute Lezon hilaren 29rako.
Markelen Irria eta Juneren Hegoak elkarteek Hegan eta Irriz Kroketa Jaia egingo dute hilaren 29an (ostirala da) Lezon. Karlos Saldise plazak jasoko ditu bi eragileek antolatu duten festaren jarduerak. Elkartasun topagunea da kroketak ardatz izango dituena, hainbat bidetatik jasoko den dirua Markelen Irriarentzat eta Juneren Hegoak-entzat izango delako, haien elkartasun proiektuekin jarrai dezaten. Behean ikus daiteke egunaren egitarau osoa. Lezoko Udalaren eta Corpachez jakien enpresaren laguntza du egitasmoak.
Antolatzaileek HITZAri adierazi diote elkartasun asmoa laguntza efektibo bilakatzeko lau modu daudela: lehena, festara joatea eta parte hartzea da. Beste hiruek laguntza ekonomikoarekin dute harremana: batetik, bertan izango diren kroketak euro batean erosi ahalko dira; bestetik, egunaren aurretik eta arratsalde horretan errifak salduko dituzte antolatzaileek, eta hainbat sariren jabe izan daitezke txartel horien irabazleak (hilaren 29ko 21:00etan emango dituzte sariak); eta azkenik, egunerako propio prestatutako elastiko edo kamisetak salgai dituzte 12 euroan.
Elastikoak erosteko hainbat bide daude:
- Posta elektroniko mezua bidalita (hemen klik egin helbidera iristeko).
- Sare sozialen bidez mezua bidalita.
- Interneteko formulario bidez (egin klik hemen eskuorri elektronikora iristeko).
- Aurrez aurre, Juneren Hegoak elkartearen lokalean (Martin Etxeberria 15, Errenteria-Orereta): Hilaren 14an (ostegunean) 10:00-13:00 eta 18:00-20:00 tarteetan; hilaren 15ean (ostiralean) 09:30-13:00 eta 18:00-19:30 tarteetan. Ordutegi horietan jada kamisetak eskatuak dituztenek horiek jasotzeko aukera izango dute.
Honakoa da hilaren 29ko Hegan eta Irriz Kroketa Jaiaren egitaraua (jarduera guztiak Karlos Saldise plazan egingo dira):
- 16:30. Real Sociedad Fundazioaren eskutik, puzgarriak.
- 17:00. Eskulanak.
- 18:30. Jaixkipe txaranga.
- 19:00. Bidasoako Erraldoiak taldearekin kalejira.
- 20:00. Zumba saioa Irene eta Bearekin.
- 21:00. Sari banaketa.
- 21:00. DJ Juanorekin, disko festa.
