Kutsadura akustikoaren gaineko "pasibotasuna" egotzi dio PSE-EEk udal gobernuari
Sozialistek, duela urtebete haiek aurkeztu eta onartu zen mozioaren neurriak ez direla aktibatu salatu dute.
2025eko Lezoko Udalaren udalbatzarrean herrian kutsadura akustikoa murrizteko proposamen eta neurriekin mozioa onartu zen ahobatez, tartean udal ordenantza sortzea eskatzen zelarik, bai eta 2023an iraungi zen zarata mapa eta ingurunea hobetzeko plana berritzea ere. PSE-EEk aurkeztu zuen mozio hura. “Urtebete geroago udalerriak ez du tresna arau emaile hori”, esan du Lezoko PSE-EEk. Horregatik, kutsadura akustikoaren gaineko “pasibotasuna” egotzi diote sozialistek udal gobernuari.
Zarataren kontrako ordenantzarik ez izatea bizilagunen kexa nagusienetakoa dela ziurtatu du Lezoko PSE-EEk. Gainera, kritikatu du egungo gobernu taldeak ez duela jarraitu babes akustiko bereziko eremuei (ZPAE) dagozkien zonako plan berriak zehazten eta onartzen. “Plan horien helburua eremu horietan dagoen zarata maila murriztea da, epe labur eta ertainean egin beharreko ekintzak ezarriz”.
PSE-EEko bozeramaile Joxean Sanchezen iritziz, ezinbestekoa da kutsadura akustikoarekin lotutako tresnak eguneratzea eta udalerriaren egungo errealitatera egokitzea. “Horrela, azken urteotan egindako hirigintza-garapen berriak barne, herritarren atsedenerako eskubidea eta bizi-kalitatea bermatzeko eta Udalbatzaren Osoko Bilkuran emandako hitza beteko da”.
