'Nork Nori Noiz?' podcastaren bigarren denboraldia aurkeztu du Badalabek
Euskararen etorkizuna, erabilera, eta transmisioari ekarpena egiteko sortu du Badalab Hizkuntza Berrikuntza Laborategiak bideopodcasta; bihar abiatuko du bigarren denboraldia.
Ezker eskuin, Kortabarria, Goñi, Irizar eta Oiartzabal. Nork Nori Noiz? podcastaren bigarren denboraldia aurkeztu du gaur Badalab Hizkuntza Berrikuntza Laborategiak Errenteria-Oreretako Joxepa antoni Aranberri anitzenearen hirugarren solairuan duen egoitzan. Goiatz Oiartzabal laborategiko zuzendariak eta podcastaren partaideak, Maite Goñi EITBko irrati eta audio zuzendariak, Asier Kortabarria Hiru Damatxoko ordezkariak, eta Mikel Irizar podcastaren bigarren denboraldiko partaideak azaldu dituzte xehe denboraldi berriaren ingurukoak.
Podcastari testuingurua jarri dio Oiartzabalek lehenik eta behin. Badalaben egitekoaz mintzatu da pasaitarra: “Pentsamendua garatzea da gure asmoa, esperientziak eta esperimentuak garatzeko espazioa sortzea, eta aldi berean ezohiko harremanak sustatzea. Hori guztia, euskararen etorkizuna, erabilera, eta transmisioari ekarpena egiteko”. Horri guztiari ekarpena egitera dator gaur aurkeztu duten bideopodcasta. Iaz jarri zuten martxan Hiru Damatxorekin elkarlanean lehen denboraldia; ordukoak Peertuben eta Balefunken kanalen bidez zabaldu zituzten lehenik, eta ondoren baita EITBren Guau plataformaren bidez ere.
Podcasta diseinatzerakoan premisa nagusi bat jarri zutela azaldu du Oiartzabalek: formatuan ezohikotasuna. “Hortik dator elkarrizketatzailerik gabeko podcasta izatea, baita jolasaren presentzia handia ere, eta etengabe pertsona ezberdin eta anitzak pasatzea bertatik”. Gainera, euskarari lotutako iruditeria elikatu nahia aipatu du laborategiaren zuzendariak. “Nagusiki ikusarazi nahi dugu eguneroko euskararen biziberritzean edo euskal komunitatearen etorkizuna bermatzeko ahots eta gorputz ugari daudela. Eta hori guztia galderatik eta zalantzatik. Bizi dugun mundu zoro honetan, etorkizuna gaurtik eraikitzen dugula sinisten dugu, eta horretarako galderak probokatu behar ditugu markoak zabaldu eta gauzak guretik eta beste modu batean planteatzeko”.
Formatuaren gaineko zehaztasun gehiago eman ditu Hiru Damatxo kide Kortabarriak: “Asmoa da bi pertsona aurrez aurre jartzea, solasean eta jolasean, eta elkarrizketa hori dinamizatzeko karta jokoak ditugu galdera ezberdinak planteatu eta objektu ezberdinak erakusten dituztenak. Ingurune ludiko bat sortzea da asmoa ideia ezberdinak plazaratzeko”. Formatua bera edo antzekoa izango da bigarren denboraldian, baina gonbidatu edota parte hartzaileen profilari dagokionean aldaketa dakar: “Lehen denboraldian bazuten denek lotura edo zerikusia Badalabekin, proiektua ezagutzen zuen jendea zen; bigarrenean ez, askok ez dute Badalaben gaineko berririk, ez dute harremanik euren artean oro har. Badalab zer den erakusteko balioko digu bigarren denboraldiko lehen saioak, Goiatz Oiartzabal eta Mikel Irizar ariko baitira”. Hurrengo bietan zeintzuk ariko diren ere jakinarazi du; bigarrenean, Onintza Legorburu ikerlaria eta Oier Zuñiga ariko dira; hirugarrenean, Antton Telleria eta Olaia Inziarte.
Bihartik martxan
Podcastaren bigarren denboraldia bihar osteguna, hilak 14, abiatuko du Badalabek Peertube kanalean eta Guau Plataforman. Astero saio bat emango dute, 22:00etan hasita, hamar denera eta uztailaren 23an izango da azkena.
Badalab aurkeztu zutela bost urte beteko direla ekarri du gogora, bestalde, Irizarrek. Laborategiko lehendakari ohia da bera. Nabarmen jarri du jende askok egin ziela galdera: Nolatan jarri ote zuten berrikuntza laborategi bateko lehendakari jubilatu bat? “Badalab sortzeko prozesuan ikasi dugu, agertokia ordez, zein garrantzitsua den pertsonak izatea berritzaileak, eta berritzailetasunak ez du zerikusirik adinarekin”. Berritzailetasuna pertsonen izaeran dagoela defendatu du Irizarrek, eta pertsona horiek bezain garrantzitsuak direla lotura “gertagaitzak” jarri du nabarmen: “Bestela inoiz bat egiten ez duten pertsonak agertoki berean jartzeak eta berritzaileak badira, aukera handia dago txinparta pizteko, belaunaldiartekotasuna garai ezberdinetakoak elkarrekin jartzea izan daiteke ez probable horien adibide egokia”. Horretaz ariko omen dira Badalaben sorreraz, eta elkarrekin egindako bideaz, podcastaren lehenengo saioan.
Sorrera sorreratik bizi izan duela Badalab proiektua azaldu du Goñik, gaurko agerraldira EITBren izenean bertaratu bada ere. Pozik azaldu da, Badalabetik sortutako ertz ugariko proiektua Guaun emango dutelako: “Nabarmendu nahiko nuke helburu partekatu asko ditugula: Euskara, gure kasuan ingurune digitalean zabaltzea. Iaz sortu geunean azaldu genuen Guau herri plataforma izan nahi zuela eta guk besoak zabalik hartzen ditugula, betiere irizpide jakin batzuen arabera”. Podcastaren formatua interesgarria jo du Goñik, baita jatorria ere “laborategi batetik dator”, eta batez ere bestela topatuko ez liratekeen pertsonek topo egiten dutela bertan, “horietako asko gainera, ez dira beti komunikabideetan daudenak. Batzuetan pertsona berak ibiltzen direla mundu horren bueltan iruditzen zaigu, eta garrantzitsua da beraz, aurpegi berriak, ezezagunak ikustea, zeresan handia dutelako”.
Beste ideia bat erdi-erdian jarri du Oiartzabalek, kontzienteki hartutako erabaki bat, “digitalitatearen ikuspegi oso zehatza dugu, eta horren arabera sinistuta gaude teknologia eta sarek hemendik eta guretzat egiteko aukera badugula eta horregatik Peertuben, YouTuberen parekide librea den kanalean zabaldu genuen eta Guaun euskarazko eta tokiko audio plataforma indartzearren”.
Bukatzeko gonbita denek bideopodcastaren bigarren denboraldiarekin bat egitera; ezagutzen ez dutenek, gainera, lehen denboraldia ikusteko aukera ere badute bi plataformetan.
