"Multikirola da bidea"
Zabalik da 2026-2027 ikasturtean Eskola Kirolan edo Multikirolan izena emateko epea. Lagun giroan, konfiantzan, eta etorkizuneko kirol oinarriak ezartzeko egitasmoarekin bat egiteko eskatu dute udalek eta ikastetxeek.
Edorta Fernandez (Oiartzun), Leire Mazizior (Errenteria), Julen Rodriguez (Pasaia) eta Eneritz Arruti (Lezo) dira eskualdeko udaletako Kirol zonegotziak. Zabalik da 2026-2027 ikasturtean Eskola Kirolan edo Multikirolan izena emateko epea. Hala jakinarazi dute Oarsoaldeko lau udaletako Kirol zinegotziek. Hilaren 22ra arteko epea dute hala nahi dutenek bizipenetan, lagun giroan, konfiantzan, eta etorkizuneko kirol oinarriak ezartzeko egitasmoarekin bat egiteko nahia dutenek. “Haurrei aukerak eman behar zaizkie esperimentatzeko, ikasteko eta batez ere gozatzeko. Horretarako Multikirola programa da biderik egokiena”, esan dute. Multikirola da bidea leloa aukeratu dute izen-emate kanpainarako.
Edorta Fernandez (Oiartzun), Leire Mazizior (Errenteria), Julen Rodriguez (Pasaia) eta Aneritz Arruti (Lezo) Kirol zinegotzien arabera adin goiztiarretan kirol bakarrean espezializatzea baino askoz aberasgarriagoa da jarduera ezberdinak probatzea. “Multikirolak koordinazioa, talde-lana, errespetua eta autonomia lantzen ditu, eta horrek eragin zuzena du haurren garapen fisikoan ez ezik emozionalean eta sozialean ere. Haur bakoitzak bere erritmoan hazteko aukera du, lehiaren gainetik ikaskuntza eta gozamena lehenetsiz”. Gaineratu dute Eskola Kirolako datorren ikasturteko baldintzak “inoiz baino erakargarriagoak” izango direla.
Multikirola eta EKEko ikasturte osoko kuota 60 eurokoa da; JolasHezikoa (eskoletan garatzen diren 6-8 urte bitarteko eskola-kirol ekintzen oinarrizko erreferentzia izatea helburu duen programa), berriz, 30 eurokoa. 2025-2026 ikasturtean Hezkuntza Sailaren beka jaso dutenek (garraio zerbitzuetako bekak kanpo) doako kuota izango dute. “Neurri hauek aukera berdintasuna sustatzeko eta familia gehiagok parte hartzeko hartu dira”, esan dute udalen ordezkariek.
Haurrak erdigunean
Udal ordezkariek adierazi dute lau udalek bat egiten dutela Gipuzkoan indarrean egon den kirol hastapeneko ereduarekin. “Haurra jartzen dute erdigunean eta arrazoi pedagogikoak, garapenekoak eta autotelikoak aztertu ondoren, Multikirola programa babesten dute”. Lau herrietako ikastetxe eta klubekin hitz egin ondoren, adierazi dute Oarsoaldean eta kirol instalazioetan Benjamin eta Kimu mailetan Multikirola programa lehenetsiko dela. Programa horretan sartzen dira aste barruko bi saio eta larunbatetako topaketa.
Kirol eskolek hastapen jarduera hori aste barruko saio batekin osatu ahal izango dute. Kimu Mailako bigarren urteko haurrek bigarren saio bat egiteko aukera izango dute kirol eskolaren batek bidezkoa ikusiko balu. Bestetik, kirol eskolen asteburuetako jarduera igandeetan egitea lehenetsiko dute, eta familia kontziliazioa dela-eta jardunaldi horiek gehiegi ez izatea eskatu dute.
Kirol ezberdinak probatzearen garrantziari azpimarra jarri diote Kirol zinegotziek. “Haurrei aukerak eman behar zaizkie. Ez dago jakiterik probatu gabe, eta ez dago hazkunderik esperientziarik gabe. Horregatik, Oarsoaldeko udalek eta ikastetxeek dei egiten diete familiei: eman izena, parte hartu eta utzi haurrei kirolaz gozatzen, presiorik gabe, askatasunez eta ilusioz”.
