Portuaren erabakien gaineko kezka, manifestazioan
Inguruan diren barruti eta udalerrietan portuaren jarduerak duen eragina kaltegarria delakoan, herri ekimeneko mugimendu batek mobilizazioa egin du gaur San Pedron.
Gaurko mobilizazioaren une bat. Pasaiako Portu Agintaritzaren (PPA) jarduerak eta erabakiek azpiegitura horren inguruan diren udalerrietan duten eraginak kezkatuta, herritar talde bat antolatzen hasi eta euren kezka jendaurrera eramaten hasi da. Gaur, kalejira kutsuko manifestazioa egin dute San Pedron, Pasaia Itsas Festibalaren erakusleihoa baliatuta. Pasaia Port, egiari zor lelodun pankartak ireki du martxa.
Argi dute herri ekimeneko mugimendu horretako kideek PPAren egitekoak egunerokoan inguruko herritan bizi direnei “kalteak” sortzen dizkiela, “portuak ez du kontuan hartzen herri batzuk bertan dituela. Erabakiak hartzen direnean herritarren iritzia kontuan ez hartzea larria iruditzen zaigu, baina are larriagoa gugan sikiera ez pentsatzea ere”.
Mugimendua San Pedron gorpuztu bada ere —han jada bi batzar egin dituzte, eta batzorde eragile bat sortu dute—, bertan direnek azaldu dute portuaren inguruan diren barruti eta udalerrietako biztanle denen intereserako dela abiatu duten dinamika, “ezinbestekoa da gainontzeko barruti zein herriek bizi dutena ere jasotzea. Bide hau denon artean egin behar da. Bide luzea da. Gure erronka da portuak herriari bizkar emanez lan egiten ez jarraitzea, eta herritarrek erabakiguneetan parte hartzeko eskubidea izatea”.
Kalteak
Gaurko mobilizazioan deitzaileek adierazi dute osasunean eragite duten kalteak sorrarazten dituela portuaren jarduerak, “ikerketa ezberdinek hala diote”. Zehaztasunetan sartuta, salatu dute San Pedroko festetarako behar diren hainbat eremu erabiltzeko ordain ekonomikoa eskatzen duela PPAk, eta deitoratu dute portuak Kaiko Herrerako sarbidea moztu duela azpiegituraren sarrera mugatua han jartzeko, “Trintxerpetik San Pedrora joateko aukera erabat baldintzatu du”.
