Emakumeen Etxeak zazpigarren urteurrena ospatuko du
Ekainaren 6an egingo dute urteurrenaren ospakizuna, bazkaria, ekitaldia eta Dj emanaldiarekin.
Emakumeen Etxearen seigarren urteurrenaren harira, bazkaria. Emakumeen Etxearen ibilbidea ospatzeko eguna ondu dute. Ekainaren 6an izango da hori, Emakumeen Etxeak zazpi urte beteko dituenean. Zazpi urte babesgune izaten, zazpi urte feminismotik antolatzen, zazpi urte sareak josten eta batez ere nahi duten emakume guztiei neurrira egindako gunea eskaintzen.
Urteurren ospakizunaren atzean Emakumeen Etxeko txinpartak daude eta 14:00etan hasiko da bazkariarekin. Parte hartzeko aldez aurretik erosi beharko dira txartelak; 18 euroan izango dira salgai Arkaitza eta De Cyne Reyna tabernetan hilaren 20tik (asteazkena) 29ra (ostirala), baita Emakumeen Etxean ere bihar asteartea 18:30etik 20:00etara, ostegunean (hilak 21) 10:00etatik 12:00etara, eta hilaren 27an 18:30etik 20:00etara.
Erosteko unean ordaindu beharko da, eta une horretan ere aukeratu menua.
Bazkalostean, 16:30 aldera, urteurrena ospatzeko ekitaldia egingo dute, eta bertan etxeko talxde ezberdinek hartuko dute parte. Bukatzeko, 17:00etan hasita DJ Lereleren musikarekin jarraituko dute ospakizuna.
Emakumeen Etxeak ateak zabalik ditu astelehen eta ostiraletan, 09:00etatik 13:00etara eta asteartetik ostegunera, 16:00etatik 20:00etara. Telefonoz deitu nahi dutenek, zenbaki honetara egin behar dute: 943 44 96 30.
