Euskaraz bizi nahi dutenentzako Ahalduntze Eskola Lezon
Lezo Euskaragarri Plan Estrategikoaren barruan, euskaratik eta euskaraz ahalduntzeko bi saio izango dira ekainean.
2024ko abenduan aurkeztu zen Lezo Euskaragarri Plan Estrategikoa. Lezoko Udalaren Lezo Euskaragarri Plan Estrategikoaren barruan, euskaraz bizi nahi duten lezoarrek elkarrekin hausnartu, ikasi eta tresna praktikoak garatzeko espazioa sortuko dute herrian, Ahalduntze Eskola. Lehen bi saioak ekainean egingo dira, hil horren 2an eta 11n zehazki. Espazio seguru eta parte hartzailea izango da, eta euskaratik euskaraz pentsatzeko sentitzeko eta ahalduntzeko gune bezala definitu du eskola udalak. Lezo Euskaragarriren ildo nagusietakoa da euskal hiztunak ahalduntzea, “horiek aktibatu eta euskaldun izatearen kontzientzia areagotzeko”.
Mugimendu feministak egindako ibilbidea aintzat hartuko dute eskolaren barruko jardueretan. “Esperientziak partekatzeko, eguneroko zapalkuntzak identifikatzeko eta subjektu aktibo gisa jarduteko, funtsean, euskal hiztunen ahalduntzea lantzeko, espazio kolektiboa sortzea du helburu iniziatiba honek”, zehaztu du udalak: “Izan ere, euskaraz bizi nahi duten herritar askok antzeko egoerak bizi dituzte sarri: hizkuntza-ohiturak mantentzeko zailtasunak, deseroso sentiarazten dituzten egoerak, erdarara jotzeko inertziak, euskaraz aritzeko zilegitasun falta…”.
Ekaineko bi saioak doan eta irekiak dira. Udalak lezoar guztiei, eta bereziko Lezo euskaldun baten alde egin nahi dutenei egin die gonbita Ahalduntzen Eskolarekin bat egin dezaten, “Lezo euskaragarri baten aldeko horiek”. Ahalduntzea kolektiboa dela uste du udalak, ez soilik banakakoena. “Horregatik, guztion parte hartzearekin, saio hauek Lezoko euskal hiztun komunitatea sendotzeko baliagarriak izango dira”.
Saioak
Ahalduntze Eskolako ekaineko saioen artetik lehena hil horretako 2an (asteartea) izango da, 18:30ean, Kultura Aretoan. Idurre Eskisabelek eta Lore Agirrek Ahalduntzea, euskalgintzatik eta feminismotik izenburupeko solasaldia garatuko dute.
Bigarrena ekainaren 11n (osteguna) jasoko du Kultur Aretoak (18:30). Tribukideekin ikusi eta ikastitakoak izeneko mahai-inguruan Kike Amonarrizek eta Izaro Arrutik egingo dute ekarpena, Arantxa Iraola kazetariaren gidaritzapean.
