Lezoko Beleak, ligaren bila
Euskadiko Ligako azken-aurreko jardunaldian emaitza bikainak lortu ondoren, liga hori irabazteko aukerak ditu herriko eskrima kirolarien taldeak.
“Kolpea mahaiaren gainean”. Hala izendatu du Lezoko Beleak eskrima taldeak larunbatean egindakoa. Izan ere, egun horretan Euskadiko Ligako azken-aurreko jardunaldia jokatu zen Donostiako Pio Baroja kiroldegian, eta Julia Curtoren garaipenari eta Eneko Castilloren bigarren postuari esker, Senior Mailako Liga irabazteko hautagai sendo dira lezoarrak.
Julia Curtok lehenengoz lortu zuen Euskadiko Senior Mailako Ligako garaipen bat larunbatean. Gogoan hartu beharrekoa da adinez Kadete Mailakoa dela Curto. Finalean Fortuna taldeko Maialen Arin gainditu zuen. Beraz, urrea Curtorentzat. “Sekulako emaitza lortu du”, esan dute taldekideek.
Castilloren zilarrerako bidea malkartsuagoa izan zen. Talde fasean hainbat porrot izan ondoren, kanporaketetara pasa eta handitu egin zen tiralaria finalera iritsi arte. Azken borrokaldi horretan Markel Amat sanpedrotarra (Fortuna taldekoa) izan zuen aurrez aurre, baina latz jardun arren, ezin izan zuen urrea lepora eraman, zilarrarekin konformatu behar. Gizonen Senior Mailan 10. izan zen Lezoko Beleak-eko kide Nico Infante, eta 13. Joao da Silva.
Eskrima taldeko kideek esan dute bai Curtok zein Castillok aukera asko dituztela Senior Mailako Euskadiko Liga irabazteko, egun sailkapen nagusian lehena delako Castillo, eta bigarren postuan delako Curto. Liga horretako azken jardunaldia (Euskadiko Txapelketa ere izango da) ekainaren 20an jokatuko da. Atzetik hurbilen dituztenak baino hobeto gelditzen badira, bientzat izango dira emakumeen eta gizonen kategorietako ligak, beraz, klub onena izango da Lezoko Beleak.
“Klub txikia gara, aurten bost urte beteko ditugu. Bi ligak lortzea sekulako balentria litzateke. Kirolari hauek asko eta oso ondo entrenatzen dira. Eskrima poztasun iturri izango da Lezorentzat”, esan du klubaren zuzendari tekniko Juma Estevezek.
