'Ategorrietan Fisterra' komikia aurkeztuko dute hilaren 27an
Datorren asteazkenean 95 urte beteko dira Guardia Zibilak zazpi lagun Ategorrietan erail zituenetik. Omenaldi gisa, Argia argitaletxeak komiki bat sortu du, eta Trintxerpen aurkeztuko dute.
1931ko maiatzaren 27an Pasaiako arrantzaleen kontra oldartu eta zazpi lagun hil zituen Guardia Zibilak Donostiako Ategorrietan. Datorren asteazkenean 95 urte beteko dira gertaera hartatik, eta omenaldi gisa, Argia argitaletxeak Ategorrietan Fisterra izeneko komikia argitaratu du Pasaiako Udalaren babesarekin. 210 orriko lanarekin batera binilo bat ere kaleratu dute, bi abesti berrirekin.
Komikiko ilustrazioak Malen Gainzarainek egin ditu eta gidoiaz Beñat Apalategi, Lander Arbelaitz eta Markel Ormazabal arduratu dira. Hitzaurrea eta bukaerako poema Koldo Izagirrek idatzi ditu, eta komikiko elkarrizketen idazketa aholkulari izan da. Komikiarentzako soinu banda bat ere sortu da, binilo formatuan eskuratu ahal izango dena. Aurrez aipatu bezala, bi abesti dira, biak elkarlanean sortuak, Niña Coyote eta Chico Tornado, Bala, Gailu eta Nakar taldeetako kideen parte hartzearekin.
Komikia sortzeko dokumentazio lan handia egin dute idazleek. Ategorrietan eraildako Jose Novo galiziarraren senideei egindako elkarrizketa bezalako testigantzek, mapa kronologikoek, argazkiek, Beñat Gaztelumendiren koplek eta pertsonaia ezagunen inguruko pasarteek osatzen dute liburua.
Hilaren 27a
95. urteurrenaren harira, omenaldi instituzionala egingo da hilaren 27an (asteazkenean) sarraskiaren plakaren aurrean, 11:30ean (Trintxerpeko alkateordetzan). Arratsaldean, aldiz, komikiaren aurkezpena egingo da Trintxerpeko liburutegian, 19:00etan. Saioa irekia izango da herritar guztientzat.
Pasaiako udal gobernuak hartutako konpromisoari jarraituta, eta azken bi urteetan egin duten bezala, ekitaldi instituzionala egingo dute Pasaiako ordezkari politikoek eta eragileek.
Ekitaldia 11:30ean hasiko da gertakarien abiapuntua izan zen Trintxerpeko alkateordetzaren ondoan. Iaz Julen Lazkano eta Joritz Lizarbe sortzaile pasaitarrek diseinatutako plaka oroigarria jarri zuen udalak alkateordetzaren fatxadan. Plaka horrek gertakarien kontakizuna laburtzen du. Aurten, omenaldiaz eta lore eskaintzaz gain, Nora Gondat artista antxotarrak zuzenean egingo du urteurrenerako ondu duen sorkuntza lanaren adierazpen artistikoa.
