Musika, dantza eta eguraldi ona; lezoarrak pozik
Giro ederra izan dute lezoarrek gaur eguerdian. Hainbat ekitaldi elkartu dira Gurutze Santuaren plaza inguruan, denak musikarekin eta dantzarekin harremandutakoak.
Lezoarrek eskerrak eman beharko dizkiote eguzkiari, asteburuan lagun dute eta. Giro ederra dago gaur herrian, noski, Mendekoste Jaien ondorioz. Jendea kalera irten da, eta hainbat ekitaldi izan dira. Musika izan da protagonista, herriko kale eta txoko guztietan. Helduak, gazteak, haurrak… denak elkartu dira, jaiek ematen duten alaitasun bereziaren bueltan.
12:00etan Gurutze Santuaren plazan Aiton-Amonen bordako bazkideek haien dantzak erakutsi dituzte. Dozenaka elkartu dira, hainbat estilo dantzatuz, baita ere cowboy antzera ikasi dutena erakutsiz. “Asko eskertzen dugu eguraldi ona, baina laino batzuk ez zitzaizkigun gaizki etorriko. Hau beroa!”, esan du bordako bazkide batek. Haien familiek inguratzen zuten plaza, mugikorrak eskuan, haien aita, ama, aitona edo amona fokuratuz.
Ordu berean, Koldobike Gezala frontoitik, XX. mende hasierako erromeri dantzak abiatu dira. Haien jantzi onenak, garaikoak, jantziz, herriko hainbat txokotan erakutsi dituzte dantzak. Banaka eta binaka, elegantzia handiarekin, ingurukoen begirada guztiak bereganatu dituzte.
Haien ondotik, Lezo Herri Eskolatik, 12:30ean atera dira buruhaundi eta erraldoiak, Munttar Txistulari Taldearekin batera. Atzetik, haur kotxez beteriko karabana bat, gurasoek bideratuta. Haurrean, aldiz, buruhaundiak zirikatzen zebiltzan gazteak, beti ere lasterka haiek irabazi nahian. Gurutze Santuaren plazatik pasa dira, eta ondoren, Donibane kaletik jaitsi dira. Txistulariak, fin, eta erraldoiak, musikarien erritmoan dantzan.
Baina festak ez du etenik. Arratsaldean, hurrengo progamazioa:
- 16:30. Tiñelun, truk txapelketa.
- 16:30. Goiko Plazan, puzgarriak.
- 17:00. Koldobike Gezala pilotalekuan, Arkirunen eskolakoen eta emakumeen Mendekoste Txapelketako finalak.
- 18:30. Erraldoi eta buruhandien kalejira.
- 19:30. Gurutze Santuaren plazatik, Elektrotxufla elektrotxarangaren irteera.
- 22:30. Gurutze Santuaren plazan, zezensuzkoa.
- 23:00. Karlos Saldise plazan, kontzertuak: Sukena eta Txamakos. Ondoren, DJ Enabil.
Hona hemen gaur eguerdian HITZAk ateratako argazkiak:
