Udalak eta San Markok hitzarmena sinatu dute hondakinen kudeaketa hobetzeko
Akordioaren baitan, errefusa egunero jasoko da, eta plastikoaren bilketa eta edukiontzien garbiketak maizago egingo dira.
Pasaiako Udalak eta San Marko Mankomunitateak hondakinen bilketa eta kudeaketa hobetzeko hitzarmen berria sinatu dute. Akordio horrekin, San Markok hartuko du beregain aurrerantzean Pasaiako hiri hondakinen bilketa osoa, errefusaren frakzioa barne. Errefusa, orain arte, udalak kudeatzen zuen zuzenean.
Udalak adierazi du hitzarmenak “jauzi garrantzitsua” dakarrela herriko hondakinen kudeaketan, “zerbitzuaren koordinazioa, eraginkortasuna eta kalitatea hobetzea” helburu hartuta. Herritarren egunerokoan “hobekuntza nabarmenak” ekarriko dituela zehaztu du udalak, “kale garbiagoak, edukiontzien mantentze hobea eta bilketa maiztasun handiagoa ahalbidetuz”.
Teo Alberro Pasaiako alkateak “positiboki” baloratu du akordioa, eta baietsi du udal gobernua azken urteetan hondakinen kudeaketa hobetzeko egiten ari den apustuaren baitan kokatzen dela: “Akordio honekin urrats garrantzitsua eman dugu Pasaiak hondakinen kudeaketa eraginkorragoa eta jasangarriagoa izan dezan. Zerbitzu hobea eskaini nahi diegu herritarrei, eta aldi berean, baliabide publikoen erabilera arduratsuagoa eta efizienteagoa egin”.
Errefusa egunero eta plastikoa maizago
Hitzarmenaren berritasun nagusietako bat da errefusaren bilketa astelehenetik igandera egingo dela hemendik aurrera, jaiegunak barne. Orain arte astelehenetik larunbatera eskaintzen zen zerbitzu hori. Aldaketa horrek astelehenetan sortzen ziren hondakin pilaketak saihestea ahalbidetuko duela nabarmendu du Alberrok: “Neurri horrek hobekuntza zuzena ekarriko du kaleen garbitasunean, usain txarren murrizketan eta edukiontzi irlen inguruko irudian.
Horrez gain, plastiko eta ontzi arinen bilketa ere indartu egingo dela aurreratu du udalak, bereziki betetze maila handiena dagoen puntuetan.
Beste hobekuntzetako bat edukiontzien garbiketan emango dela adierazi du udalak. Aurrerantzean, San Markok hartuko du edukiontzien barruko zein kanpoko garbiketaren ardura osoa, eta garbiketa lanak ere maiztasun handiagoarekin egingo dira. “Horrek higiene baldintzak eta herriko espazio publikoen egoera hobetzen lagunduko du, batez ere udan”, zehaztu du udalak.
Hitzarmenak, gainera, ingurumen ikuspegitik ere “onura handiak” ekarriko dituela baietsi du Iraitz Pazos Hirigintza, Ingurumena eta Zerbitzuetako zinegotziak: “Gaikako bilketa indartzea eta hondakinak modu egokiagoan bereiztea funtsezkoa izango da birziklatze tasak handitzen jarraitzeko eta errefus kopurua gutxitzeko”. Pazosek jakinarazi du hondakinen kanpaina berria martxan jarri zenetik birziklatze tasa %3an igo dela urte bakarrean, eta horrek 100.000 euroko aurrezkia ekarri duela diru kutxa publikoan.
Akordioak “udal baliabideen optimizazioa” ere ahalbidetuko duela baietsi du udalak. Udal langileak herritarrek eskatzen dituzten bestelako mantentze eta zerbitzu lanetan jardun ahal izango dira hemendik aurrera: kaleetako konponketetan, mantentze lanetan, esku hartze urgenteetan edota herriko azpiegituren zaintzan. Udalak jasotzen jarraituko dituen frakzio bakarrak Donibane eta Torreatze kaleetakoak dira, oinezkoen elkarbizitzarako gune bereziak baitira.
Aurrezkia eta egonkortasuna
Udalak egindako txosten teknikoaren arabera, hitzarmen berriak epe ertainera “aurrezki ekonomikoa eta egonkortasun handiagoa” ere ekarriko dituela jakinarazi du. Udalaren hondakin bilketako ibilgailuak 20 urte bete ditu, eta “berehala” ordeztu beharko litzatekeela zehaztu du udal erakundeak. Berri baten kostua 400.000 eta 450.000 euro artekoa litzatekeela gaineratu du udalak, urteko mantentze eta erregai gastu handiez gain. Zerbitzua modu eraginkorragoan eskaintzeko, San Markok baliabide tekniko eta logistiko egonkorragoak dituela nabarmendu du udal erakundeak. Hitzarmenak, gainera, edukiontzi irisgarriagoak pixkanaka ezartzea ere aurreikusten du, mugikortasun urriko pertsonen erabilera errazteko.
Azkenik, herritarren lankidetza eskatu du Alberrok: “Udaletik baliabide guztiak jartzen ari gara hondakinen kudeaketa hobetzeko, baina herritarren inplikazioa ere ezinbestekoa da. Birziklatzea, hondakinak edukiontzi barruan uztea eta altzarien bilketa egunak eta puntuak errespetatzea guztion ardura da”.
Datozen asteetan kontzientziazio kanpaina berria abiatuko da, hainbat hondakin gunetan olana handiak jarriz. Bertan, hondakinak edukiontzietatik kanpo uztea arau hauste arina dela gogoraraziko da. Pasaiako hondakinen udal ordenantzaren 46.1 eta 49.1 artikuluen arabera, jokabide horiek 1.000 eurora arteko isunak ekar ditzaketela jakinarazi du udalak.
