Euskaltzaleon martxara deitzeko agerraldia, ostiralean
Euskaltzale oro deitu dute agerraldian parte hartzera, ahalik eta argazkirik handiena eta jendetsuena egiteko ekainaren 13ko euskararen aldeko martxa babesteko.
Dozenaka lagun elkarratetratu ziren euskararen kontrako oldarraldoi antolatua saltzeko joan den martxoan. Euskaltzaleon Martxa lelopean, ekainaren 13an Iruñeko kaleak betetzeko mobilizazio jendetsua antolatzen ari dira Euskalgintzaren Kontseilua osatzen duten eragileak.
Azken hamarkadetan berreskurapen ziklo bat gertatu dela aitortu duten arren, gero eta gehiago direla euskararen etorkizunaren gaineko kezka eta larritasuna adierazten dituzten datuak eta ikerketak jarri dute nabarmen, eta zailtasun horiei erantsi die euskararen biziberritzearen kontrako oldarraldi antolatu bat.
Sinetsita dago Euskalgintzaren Kontseilua posible dela euskararen biziberritzeari bultzada ematea, “Pizkunde berri bat eragitea, eta horretarako ezinbestekoa da euskaltzaletasunaren giharra indartzea. Horretara dator ekainaren 13ko mobilizazioa, euskaltzaleok antolatzera, euskaraz bizitzeko baldintzak sortzera, Euskaraz bizitzeko behar den dena aldarrikatzera”.
Martxa arratsaldez egingo dute. 17:00etan Iruñeko hiru puntu ezberdinetan elkartuko dira herritarrak: Antoniutti, Runako Parkea eta Askatasun Enparantza. Puntu hauetatik Iruñeko kaleak harrotasunez beteko dituzten hiru zutabeak abiatuko dira. Zutabeek Gazteluko Plazan bat egingo dute eta bertan egingo da ekitaldi politikoa, bukaera berezi bat emanez.
Hori horrela, deialdiarekin bat egin eta herritar guztiak bertara deitzeko agerraldi publikoa egingo dute Oreretako euskaltzaleek, eta familia argazkia. Euskaltzale oro deitu dute agerraldian parte hartzera, ahalik eta argazkirik handiena eta jendetsuena egiteko ekainaren 13ko euskararen aldeko martxa babesteko. Hitzordua, Mikelazuloko pasabidean, ostiralean —hilak 29— 19:00etan.
