"Gaur, txinparta hori behar dugu"
Bokalek, Pasaiako Euskararen Aholku Batzordeak ekainaren 13an Iruñean egitekoa den manifestaziora joateko dei irekia egin die pasaitarrei.
Bokaleko kideak, atzoko agerraldian. Bokalek, Pasaiako Euskararen Aholku Batzordeak ekainaren 13an Iruñean egitekoa den manifestaziora joateko dei irekia egin die pasaitarrei. “Guztia haize kontra egon denean, euskaltzaletasuna aktibatu da. Guk, Pasaiako euskalgintzan gabiltzanok, badakigu zer den hori. Badakigu zer den herri bat aktibatzea. Badakigu zer den jendea saretzea, ilusioa piztea, konpromisoa eskatzea. Badakigu zer den txinparta bat piztu eta sua zabaltzea. Eta gaur, txinparta hori behar dugu”, esan zuten atzo Trintxerpen egindako agerraldian. Euskalgintzaren Kontseilu osatzen duten eragileek deitu dute Iruñeko mobilizaziora, Euskaraz bizitzeko behar den dena. Euskaltzaleon martxa da. Pasaiatik hara joateko autobusak antolatu ditu Bokalek. Beheko koadroan dago horren gaineko informazioa.
Euskara eta euskal hiztun komunitatea larrialdi linguistikoan daude. “Datu soziolinguistikoek, eguneroko bizipenek eta azken urteetako joerek argi erakusten digute: suspertze zikloa agortzen ari da, eta atzeraldiaren arriskua handia da. Arnasguneak ahultzen ari dira, erabilera apaltzen eta eskubideak kolokan jartzen. Oldarraldi judizial, politiko eta mediatikoak euskararen desofizializazioa elikatzen du. Globalizazio homogeneizatzaileak hizkuntza nagusiak indartzen ditu, eta minorizatuak ahultzen”, zehaztu zuten atzokoan Bokaleren izenean hitz egin zutenek. Hala ere, gaur aurretik, milaka euskaltzaleren ekimenari esker euskararen pizkundeak izan direla adierazi zuten, “guztia haize kontra zen. Guztia haize kontra denean, euskaltzaletasuna aktibatu da”.
Hizkuntza politiketan jauzia. Eskaera hori egin du Bokalek, “paradigma aldaketa bat” galdegin du: “Ezagutza benetan orokortuko duten politikak, erabilera normalerako baldintzak sortuko dituzten neurriak, ofizialtasuna Euskal Herri osoan, zeharlerrotasuna politika publiko guztietan. Tresnak badakizkigu. Oinarriak landuta daude. Adostasun sozial zabala eraikitzen ari da. Baina jauzi hori ez da bakarrik maila instituzionalean erabakiko. Indar soziala behar du”.
Ekainaren 13koa “Pizkunde berri baterako bidean” euskaltzaleen indarra erakusteko une kolektiboa izango da, hizkuntza politiketan “jauzi ausarta exijitzeko” unea: “Sinetsita gaude, herri honek badu indarra. Badu antolatzeko gaitasuna. Badu ilusioa. Orain, indar hori bideratu behar dugu. Eta bide horrek ekainaren 13an geltoki garrantzitsu bat du.
Mundua hizkuntza minorizatuen kontra badator, guk euskara jarriko dugu mundu bizigarriago baten alde. Eta badakigu hori zuek bezalako euskaltzale antolatuek egiten duzuela posible. Euskaltzaletasuna da gaurko giltza. Euskaltzaletasuna da itxaropena”.
Iruñera joateko autobusak.
Bokalek ekainaren 13ko Iruñeko manifestaziora joateko autobusak antolatu ditu. Horietan izena emateko bi bide daude: lehena, Pasaiako Udalaren webgunekoa da, eta bestea Bokaleren sare sozialetakoa. 10 euroko prezio orokorra du Nafarroako hiriburuko martxarako autobus bidezko joan-etorriak; jubilatuen, langabetuen, haurren eta gazteen tiketaren prezioa 5 eurokoa da.
Autobusen irteera Donibaneko Meipin izango da, eta geldialdiak egingo ditu barrutietan. Hala, ekainaren 13ko 14:50an irtengo dira Donibaneko auzotik autobusak, ondoren antxotarrak hartzeko (Ibaiondon, 15:00etan). Antxotik San Pedrora egingo dute bidea ibilgailu kolektiboek (15:10an, autobusen geltokian) eta ondoren trintxerpetarrak jasoko dituzte postetxe pareko geltokian (15:15ean).
