Sasoiko laugarren derbia jokatuko dute bihar Doniparik eta Antxo AFk
Errege Kopako play-offetako finalerdietako partida jokatuko dute arrosek eta zuri-gorriek, 17:00etan. Partidaren aurretik, Antxok omenaldia egingo dio Mauro Aierza jokalariari.
Hirugarren Mailako denboraldia iragan asteburuan bukatu ondoren, Donipari eta Antxo AF nor baino nor arituko dira bihar (larunbata) Errege Kopako play-offetako finalerdietan, finala helburu. Partida 17:00etan hasiko da Larrabide kiroldegian.
Denboraldiko laugarren derbia izango da arrosen eta zuri-gorrien artean, eta bi taldeak dinamika onean iritsi dira sasoiaren bukaerara. Donipari bigarren postuan sailkatu da Hirugarren Mailan, eta Antxok lau garaipen lortu ditu ligako azken bost partidetan. Biak ala biak “konfiantzaz beteta” iritsiko dira biharko neurketara.
Partidaren aurretik, gainera, Antxok omenaldia egingo dio Mauro Aierza Bustamante jokalariari, 16:45ean. Aierzak 30 urte baino gehiago eman ditu areto futbolean murgilduta, eta bere ibilbidean Euskadiko eta Espainiako selekzioetan aritu da. Bederatzi denboraldiz jokatu du talde zuri-gorrian, bi etapa ezberdinetan.
