Udalerriarentzat proiektu estrategikoak "desblokeatu" nahi dituela dio PSE-EEk
Hogei urte dituzten proiektu "estrategikoak" ez dituela egin salatu dute sozialistek eta ekiteko ezintasuna egotzi gobernu taldeari.
HAPOari alegazioak egiteko agerraldia.PSE-EE Udalerriarentzat estrategikoak diren proiektuak garatu ez izana egotzi dio udalari PSE-EEk, eta kezka azaldu du gainera, etxebizitza beharra etengabe ari delako gora egiten. Hori horrela, hamabos emendakin aurkeztu dizkio gobernu taldeak aurkeztutako HAPOari. Emendakin horien helburua ere azaldu dute sozialistek: “Udalerriak etxebizitza eraikitzeko duen gaitasuna areagotzea eta modu ordenatuan egitea, mugikortasuna, aparkalekua eta auzoetako bizi kalitatea hobetuta”.
Etxebizitza eraikitzeko bi proiekturen gainean eragitea proposatu du alderdi sozialistak: Gamongoa eta Perutxene. Bi eremu horietan aurreiksuten duela HAPOak eraikiko diren etxebizitzen bi herenak eraikitzea. hori horrela, Gamongoan bizitoki edukiera gutxienez 700 etxebizitzara zabaltzea proposatu du PSE-EEk. Perutxenen, berriz, aurreikusia dagoen garapena handitzea proposatu du Egiluze ikastetxe pareko lur orubetan erabilera industriala etxebizitza erabileragatik aldatuta. Sinistuta azaldu dira sozialistak hala eginda, egun dagoen etxebizitza arazoa “desblokeatzea” dagoela.
Eta etxebizitza gehiago eraikitzeko proiektu berriak ere proposatu dituzte: Touring hiribidea eta Tomas Lopez, Lousada, edota topoaren kotxetegiak, “azken horretan 200 etxebizitza babestu aurreikusten dira”.
Mugikortasuna, aparkalekua eta auzoen babesa. Hiru arlo horietaz ere mintzo dira sozialistak, “hiru arlo horien eskutik egin behar delako Errenteriaren hazkundea”. Besteak beste, Tomas Lopez eta Loudsadan eta Beraunen aparkaleku eremu berriak sortzea proposatu dute. Horrekin batera, Gabierrotako Evaristo Bouzas plaza elkarbizitzarako espazio gisa babestea proposatu du PSE-EEk eta Igantzen aurreikusitako jarduketa berrikustea edota Miauka elkartearentzat espazio berria aurkitzea.
