Alkartasuna, dantzalditik Sagardo Jaira
Alkar Txikik ikasturte bukaerako saioa egin zuen igandean. Larunbatean (hilak 6), Antxoko XXXI. Sagardo Jaia.
Alkar Txikiren talde argazkia, igandean.Alkartasuna Euskal Dantza Taldea Antxoko Alkartasuna Euskal Dantza Taldeak barrutian klasiko eta ezinbesteko diren hitzorduak antolatzeari ekin dio uda hurbil den honetan. Hasteko eta behin, joan den igandean (maiatzaren 31n) Alkar Txikik emanaldia egin zuen Biteri plazan, ikasturtean ikasitakoak jendaurrera eraman zituzten dantza taldeko gazteenek. Ikusleek gogoz jarraitu zuten saioa.
Larunbatean (hilaren 6an), kultur eragileak urtero-urtero hutsik egin gabe antolatzen duen beste ekitaldi bat: Antxoko Sagardo Jaia. XXXI. ekitaldia izango du aurten sagardozaleen topaguneak, eta Biteri plazan ezarriko duen gunean askotariko sagardo klaseak dastatzeko aukera izango da. 18:00etan zabalduko dute txotxa.
Botila berdeen dantzaz aparte, animazioa eta jaki sorta izango direla aurreratu dute Antxoko dantza taldekoek. Gainera, jende asko espero da herrian, Pasaia-Lezo Lizeoaren 50 urteurreneko ekitaldi nagusia bertan egingo baita larunbatean bertan, egun osoz.
Behean, Alkar Txikiren igandeko dantzaldiaren hainbat irudi.
