Orratx!-eko txiki eta gazteak, oholtzara
Igande eguerdian bi obrako emanaldia egingo dute Orratx! Txiki eta Orratx! Gazte taldeetako kideek Gezalan.
Ottax!-eko gazteenen iazko talde argazkia.Orratx! Gogor lan egin dute Orratx! Antzerki Taldearen barruko gazteenek ikasturtean zehar. Nola ez, oso ondo pasa dute antzerkigintzan. Orain, egindako lan gustagarri horri etekina ateratzeko garaia iritsi zaie, eta hori egiteko modurik onena lokalean garatutakoa oholtzara eramatea da. Igandean (hilaren 7an) jasoko ditu Gezala Auditoriumak Orratx! Txiki eta Orratx! Gazte taldeen emanaldia, 12:00etan hasita.
Txikien taldeak Uxa uxa parking antzezlana jarriko du jendaurrean. “Enpresari dirudun batek parking berri bat egin nahi du zirkua dagoen tokian. Zirkuko artistek dena emango dute beren artea bizirik mantentzeko. Artea edo diru nahia?”; horri erantzungo diote aktore txikiek.
Gazteek, berriz, Sari potoloa obra egingo dute. Horra sinopsia: “Lezoko sari potoloa lapurtua izateak pertsonaien nahiak, beldurrak, aspirazioak eta erabakiak jartzen ditu jokoan. Orratx!-eko gazteen aurtengo proposamenean gertakizun konkretu batek, zenbat bizitzetan eragin dezakeen ikustaraziko digu”.
Helduak, hilaren 13 eta 14an
Gazteenen ondotik, Orratx!-en nagusien taldearen txanda iritsiko da. Hilaren 13 eta 14an, hau da, hurrengo asteko larunbat eta igandean bi emanaldi egingo dituzte. Bi saioak Gezalan izango dira, 19:30ean. Gaueko hitzak lana estreinatuko dute herrian, Lierni Fresnedok zuzendutakoa, eta Jurgi Sarasolaren testuan oinarrituta. Leire Agirre, Edurne Agirrezabala, Begoña Azpiazu, Nahikari Gaztelumendi, Amaia Herrero eta Joseba Salaberria aktoreak arduratuko dira obra taularatzeaz. “Tragikomedia absurdua” dela aurreratu dute Orratx!-eko kideek.
HITZA Orratx!-eko kideekin izango da datorren astean. Erreportaje bidez, xehetasun gehiago emango ditu.
