Mikel Urdangarin eta Herri Arte Eskolako Orkestra elkarrekin
Kurtso bukaerako kontzertu berezian izango dute gonbidatu Urdangarin. Hilaren 19an izango da emanaldia, Lekuona Fabrikan.
Urdangarinen sormen lana gertutik ezagutzeko aukera egongo da igandean. Gonbidatu berezia izango du Herri Arte Eskolako Orkestrak aurten, ikasturte bukaerako kontzertuan: Mikel Urdangarin abeslaria. Hilaren 19an izango da hori, Lekuona Fabrikan, 18:30ean hasita eta diziplina guztietako emanaldi eta aurkezpenen asteari ginga jarriko dio. Euskal musikagintzako erreferenteetako bat da Urdangarin (Zornotza, 1971) eta bere ibilbidean hainbat formatu eta proposamen artistiko landu ditu. Horien artean da, Badena eta ez dena lana, Bilboko Orkestra Sinfonikoarekin grabatua.
Herri Arte Eskolako Orkestrak erronka bere gain hartu, eta hainbat pieza zuzenean taularatuko ditu, Sergio Zapirainen zuzendaritzapean, “ikasleek formatu handiko errepertorio garaikidea landu eta lehen mailako sortzaileekin elkarlanean aritzeko aukera izango dute”, azaldu dute Herri Arte Eskolako arduradunek.
Kontzerturako sarrerak salgai dira jada, Kulturaren webgunean (klik hemen) 5 euroan. Gainera, egun berean, Lekuona Fabrikako emanaldiaren ondoren, Zumardian jarraipena izango du jai giroak 20:00etan eta 22:00etan Herri Arte Eskolako ikaslez osatutako bi erromeria talde ariko baitira zuzenean, udako oporraldiari ongietorria emateko.
Herria Arte Eskolako arduradunek emanaldietara bertaratzera deitu dituzte herritarrak.
