Xenpelar Bertso Eskolaren auziaren harira bilera egin dute aldundiak, udalak eta Emakundek
Aldundiak beharrezko baliabideak eskaini dizkie Udalari eta familiei biktimen eta haien ingurunearen babesa bermatzeko
Dozenaka eta dozenaka lagunek salatu dute Xenpelar bertso Eskolako irakasle batek egindako eraso matxistak. Gipuzkoako Foru Aldundiak bilera instituzionala egin du gaur goizean, Errenteria-.Oreretako Bertso Eskolan adingabeei egindako sexu-erasoei buruzko informazio guztia bertatik bertara ezagutzeko, baita alkateak eta udalak biktimen babesa bermatzeko hartutako erabakien berri izateko ere. Aldundiak adierazi du prest dagoela udalari eta familiei dauden baliabideak emateko, bai eta biktimen eta haien ingurunearen babesa eta ongizatea bermatzeko beharrezkoak diren neurri guztiak aktibatzeko ere.
Foru erakundeak berak eskatu du bilera, salatutako gertaerek eta ondorengo bilakaerak sortutako zalantzak eta ziurgabetasuna direla eta, jakinarazi duenez, eta Gobernantzako diputatu eta foru bozeramaile Irune Berasaluzek, Berdintasunerako Organoaren zuzendari Nerea Isasik eta Emakundeko zuzendari Miren Elgarrestak parte hartu dute. Bertan, Aizpea Otegi Errenteriako alkateak egindako ekintza guztien berri eman ahal izan duela azaldu dute foru aldunditik.
Gipuzkoako Foru Aldundiak gogorarazi du gertakarien kudeaketaren erantzukizuna Errenteriako Udalari dagokiola, eta erakundeen arteko lankidetzarako konpromisoa berretsi du. Bestalde, adingabeen babesaren arloan dituen eskumenei helduz, adierazi du lehentasuna dela biktimen eta haien ingurunearen ongizatea bermatzea, bai eta garatzen diren jarduerak babes, laguntza eta arreta egokiaren printzipioetara egokitzen direla ziurtatzea ere. Foru bozeramailearen hitzetan, “edozein jarduera instituzionalek biktimak erdigunean kokatu behar ditu, haien babesa, laguntza eta erreparazioa bermatuz”. Horretarako, nabarmen jarri duenez, “beharrezkoa da baliabide guztiak jartzea, biktimek beren eskubideak berme osoz baliatu ahal izan ditzaten eta behar duten laguntza jaso dezaten”.
Era berean, Berasaluzek adierazi duenez, “horrelako gertaera batzuk ezin dira soilik izaera pribatuko akordio edo irtenbideen bidez jorratu, iraganean egin omen den bezala; aitzitik, erakundeen erantzun irmoa eskatzen du, biktimen eskubideak eta kaltetutako pertsona posibleen babesa bermatzera bideratua”.
