Kate antifaxistan ariko da Zintzilik irrati librea
Larunbatean, hilaren 6an, hamalau orduko emisio bateratu antifaxista egingo dute Penintsulako eta Abya Yalako hainbat irrati librek.
Goiko zatian pankarta txikituta, eta behekoan pankarta osorik eraso egin aurretik. Hamalau orduko emisio bateratua egingo dute penintsulako eta Abya Yalako hainbat irrati librek datorren larunbatean, hilaren 6an, eta kate horretan ariko da Zintzilik Irrati Librea. Aurten inoiz baino argiago “erresistentzia antifaxistaren” aldeko mezua zabaldu nahi dutela azaldu dute: “GUre helburua da, egunerokoan beldurarren eta gorrotoaren aurka lanean ari diren kolektibo eta pertsonentzako bozgorailu izatea”. Hori horrela, irrati espazio partekatu horretan, ahotsak batu eta ozen adieraziko dute “ez direla pasako”.
Goizeko hamarretan hasiko dute emankizuna eta 00:00etan bukatuko. Zintzilik Irratiarekin batera, Madrilgo Agora Sol Radio, Santander (Kantabria, Espainia) Radio Argayo, Ruido Feminista Radio (online), Zaragozako (Aragoi, Espainia) Radio La Granja eta Radio Topo, Radio Qk (Uvieu, Asturias), Linterna de Diogenes (online), Bartzelonako (Katalunia) Radio RSK eta Contrabanda FM, Bilboko Irala Irratia, Granadako Radio Almaina (Andaluzia, Espainia), Panamako Radio Temblor eta Chiapaseko Colectivo La insurgentek.
Zintzilik irratiaren tartea 17:00etatik 18:00etara izango da, eta saioan faxismoaren biktima izan diren pertsonen biografiak irakurriko dituzte, LGTBIKA+fobiaren Aurkako Nazioarteko Egunaren harira plazaratutako komunikatua irakurri, eta Gaztaño auzoko bizilagun bati elkarrizketa egingo diote auzo horretan azken aldian egindako eraso faxisten inguruan.
Irratsaioa FMko 100ean entzun ahal izango da Oarsoaldean, bita webgunea edota katean parte hartuko duten irrati libreen bidez ere.
