Mugi txartela udaletxean nahi du Lezoko PSE-EEk
Proposamena egin dio udal gobernuari: udaletxean Mugi txartela egiteko edo kargatzeko zerbitzua eskain dezala.
Lezoko PSE-EEren udal taldeak proposamena egin dio udal gobernuari: udaletxean Mugi txartela egiteko edo kargatzeko zerbitzua eskain dezala. “Honen helburua Mugi zerbitzua herritarrei hurbiltzea da, udalerriko herritarrek txartela zuzenean udaletxean eskatu, kargatu edo kudeatzeko aukera izan dezaten. Horri esker, zerbitzua modu erosoago, hurbilago eta eskuragarriagoan erabili ahal izango lukete”, azaldu du Joxean Sanchezek, PSE-EEren eledunak.
Sanchezen arabera, udalaren, Gipuzkoako Foru Aldundiko Mugikortasun Departamenduaren eta Gipuzkoako Garraioaren Lurralde Agintaritzaren arteko akordio bidez gauzatuko litzateke Mugi udaletxean kudeatu ahal izateko aukera ezartzea, “Gipuzkoako hainbat udalerritan egiten ari diren bezala”.
PSE-EEko bozeramailearen hitzetan, udalerrian Mugi puntu bat izateak “beharrezkoak ez diren joan-etorriak saihestuko lituzke, eta hobekuntza nabarmena ekarriko lieke adinekoei, gazteei eta garraio publikoaren ohiko erabiltzaileei. Horregatik, zaila litzateke ulertzea Lezoko herritarrentzat erabilgarria, erraza eta onuragarria den neurri honekin bat ez egitea. Hori dela eta, espero dugu gobernu taldeak proposamen hori positiboki balioestea eta beharrezko kudeaketak egitea”.
