Autoen sartu-irtenak kontrolatzeko, kamerak Iztietan
Hondarribia eta Donostia kaleetan jarri ditu kamerak udalak, "lurzoru publikoaren segurtasuna, irisgarritasuna eta banaketa egokia" bermatzeko.
Errentriako Udalak kamerak jarri ditu Iztieta auzoko Hondarribia eta Donostia kaleetan, autoen matrikulak irakurtzeko. Horrela, udalak “lurzoru publikoaren segurtasuna, irisgarritasuna eta banaketa egokia” hobetu nahi ditu. Kamera sistema horri esker ibilgailuen sarrera-irteerak automatikoki kontrolatuko dira ezarrita den araudia betetze aldera, eta gainera, kale horien oinezkoentzako izaera zaintzea errazagoa izango da.
Udalak oroitarazi du kale horietarako autoen sarbidea mugatua dagoela, eta hori ez betetzeak zigorrak ekar ditzakeela. Zama lanetarako ordutegia 08:00etatik 12:00etara artekoa da bi kale horietan; autoak 20:00etatik 08:00etara aparka daitezke.
“Horrela”, zehaztu du udalak, “espazio publikoa ahalik eta gehien aprobetxatzen da, zerbitzuetarako sarbidea eta gaueko aparkalekua bermatuz, eta oinezkoentzako gune bat izateko aukera emanez”.
Oinezkoen gunean dauden garajeen erabiltzaileek edo baimendutako bestelakoek sarbide baimena berritu beharko dute LPRren datu-basean ez badaude sartuta.
