Langile gehiago subrogatzea eta soldatak izoztea adostu dute Papresako plantillak eta CL enpresak
Lehiaketa prozeduraren ardura duen epailearen oniritziaren zain, Extremadurako (Espainia) CL Grupo Industrialek eta Papresako plantillak akordioa egin dute lantegiaren erreskaterako.
Papresako langileak, gaur. Papresa erosteko akordioa itxi dute lantegiko plantillak eta Badajozeko (Extremadura, Espainia) CL Grupo Industrial taldeak bi asteko bileren ostean. Itxita akordio hori, baina, ez da oraindik behin betikoa; izan ere, hartzekodunen konkurtsoaren prozesua gidatzen duen epaileak erabaki behar du hitzarmen hori behin betikoa izan dadin.
CLk 40 milioi euroko inbertsioa egingo du. Hasieran proposatutakoak baino 19 subrogazio gehiago onartu ditu enpresa talde horrek, Papresako langileek lantegiaren bost lan txandak bermatzeko ezinbestekoa jo ondoren kopuru hori. Hori horrela, hasieran aurreikusiak zituen 148 langileen ordez, 167 mantenduko ditu CL taldeak, plantillaren %80. Hori onartu bai, baina aldi berean lanaldia asteko 35 ordutik, 37,5 ordura pasatzea, eta datozen bi urtean soldatak izoztuta izatea exijitu du.
Bi aldeek PRECOan baldintza horiek onartuta, argi berdea CLk, Papresa bere egiteko.
Plantilla murrizketak batez ere bulego eta administrazio arloan egingo dituztela jakinarazi dute bestalde; arlo horietan 20 eta 30 lanpostu artean murriztuko ditu CL enpresa taldeak.
Papresak apirilaren 23an aurkeztu zuen borondatezko hartzekodunen konkurtsoa.
