Lezoko Mahai Politikoa eta arduraduna aurkeztu ditu EH Bilduk
Aitzol Saizar Viaña izango da EH Bilduren Mahai Politikoaren buru. Ostiralean Ibai Ondon egindako ekitaldian egin zen aurkezpena.
Lezoko EH Bilduko kideak, ostiraleko aurkezpenean.Lezoko EH Bildu Lezoko Mahai Politikoa aurkeztu eta arduradun politikoa izendatu du EH Bilduk. Joan den ostiralean egin zuten mahai hori nahiz koalizioaren herriko burua aurkezteko batzarra Ibai Ondon. Aitzol Saizar Viaña izango da herriko bilkideen buru aurrerantzean.
Ekitaldian EH Bilduren Gipuzkoako arduradun politiko Nekane Zinkunegi izan zen. Hark adierazi zuen koalizioaren III. kongresuan herriarekin lotura estutzea lehentasunezko apustu bezala izendatu zela, eta Lezon ere norabide horrekin ari direla, “herrian errotutako komunitate politiko eta sozial sendoa eraikitzen ari gara”. Hala, tokian tokiko egituratzean aurrera urratsak egitea dagokio EH Bilduri Zinkunegik esan zuenez, “argi dugulako hegemonia soziopolitikoa lehiatzen badihardugu, hauteskundeetako babesaz eta instituzioetako ordezkaritzaz haragoko gorputza behar duela EH Bilduk. Eta apustu horren barnean kokatzen dira tokiko arduradunen izendapena edota herrietako mahai politikoen eratzea”. Baina, urrats hori berez ez dela helburu azaldu zuen herrialdeko arduradunak, “tresnak dira proiektu politikoaren mesedetan lan egiteko eta prozesu klabeetan aurrera egiteko”
Zinkunegik nabarmendu zuen azken urteotako bilakaerak erakutsi duela ezkerreko subiranismoak gero eta babes sozial handiagoa duela Euskal Herrian, “eta herriari lotutako jardunak eta gertutasunak berebiziko garrantzia dutela proiektu politiko sendo bat eraikitzeko”. Alta, begirada herrietatik eta Lezotik harago jarrita, herrialdeko ordezkariak esan zuen “mundua hankaz gora den honetan segurtasunerako eta itxaropenerako” proiektu partekatua dela EH Bilduk proposatzen duena.
