2027an hasiko dira eraikitzen Aralar kaleko gazteentzako alokairuzko etxebizitzak
Ekainean aterako dira lizitaziora eraikitze lanak, eta iraila-urrian esleituko dituzte. 52 etxebizitza eta anbulatorio berria egingo dituzte.
Eusko Jaurlaritzak aste honetan iragarri du 2027an hasiko dela Aralar kaleko gazteentzako aldi baterako alokairuzko etxebizitzen eraikitze prozesuarekin. Ekainean argitaratuko du Etxebizitza eta Hiri Agenda Sailak lizitazioa, eta lanak zein enpresak egingo dituen esleitzeko epea iraila eta urria artean egingo da. 52 etxebizitza publiko eraikiko dira bertan, eta aurreikusia dago eraikinaren behealdean Lezoko anbulatorio berria egitea. Lezoko Udalak baikor jaso du erabakia.
“Sustapen berri honi esker, etxebizitza duina izateko aukerak zabaldu egiten dira”, esan du udalak, “bereziki gazteei ematen die erantzuna”. Gazteentzako izango dira gehienbat etxebizitza horiek, alokairuzkoak, eta horietan gehienez bost urteko epean bizi ahal izango dute. “Emantzipazio-prozesuak erraztea eta gazteek Lezon bertan etxebizitza duina eskuratu eta bizi-proiektuak garatu ahal izatea du helburu”.
Jaurlaritzak eraikiko ditu etxebizitzak, udalak emandako lur eremuan. Hala, Mikel Arruti alkateak zehaztu du Lezoko Udalaren Etxebizitza Planaren barruan dagoela Aralar kaleko jarduketa. “Plana zabala da, proposamen integral bat, eta lezoarren etxebizitza eskubidea bermatzeko lan-ildo guztietan egin behar ditugu aurrerapenak. Planak jasotzen dituen hainbat ekintza bete ditugu dagoeneko eta beste batzuk egikaritzeko bidean gaude, baina etengabe eta modu arduratsuan jarraituko dugu baliabide publiko guztiak erabiliz, herritarren bizi-kalitatea hobetzeko”, Arrutik: “Planaren lehentasun estrategikoen artean kokatzen dira babes publikoko etxebizitza parkea handitzea edo Lezo Tentsio Handiko Bizitegi Eremu izendatzea, eta aurten jaso du Lezok tentsionatutako eremuaren izendapena”.
