'Tribukideekin ikusi eta ikastitakoak' gaur Lezon
Lezo Euskaragarri Ahalduntze Eskolaren barruko bigarren saioa izango da gaur. Izaro Arrutik eta Kike Amonarrizek mahai-ingurua egingo dute, Arantxa Iraola kazetariak gidatua.
Izaro Arrutik eta Kike Amonarrizek emango dute solasaldia. Lezo Euskaragarri Ahalduntze Eskolaren bigarren saioa jasoko du gaur (hilak 11, osteguna) Kultura Aretoak. 18:30ean hasita, Tribukideekin ikusi eta ikasitakoak mahai-ingurua egingo dute Izaro Arrutirekin eta Kike Amonarrizekin, Arantxa Iraola kazetarik gidatua. Tribuaren berbak ETB1eko saioaren aurkezleak dira Arruti eta Amonarriz, eta haien esperientziak baliatuta euskararen egoerari eta aukerei buruz gogoeta irekia egiteko saioa izango da.
Lezoko Udalaren Lezo Euskaragarri Plan Estrategikoaren barruan, euskaraz bizi nahi duten lezoarrek elkarrekin hausnartu, ikasi eta tresna praktikoak garatzeko espazioa sortuko dute herrian, Ahalduntze Eskola. Horren barruko lehen jarduera hilaren 2an egin zen, Kultura Aretoa goraino bete zen Idurre Eskisabelen (Lorea Agirre ezin izan zen bertaratu) Ahalduntzea, euskalgintzatik eta feminismotik izenburupeko solasaldia jarraitzeko.
Udalaren arabera, esperientziak partekatzeko, eguneroko zapalkuntzak identifikatzeko eta subjektu aktibo gisa jarduteko, “funtsean, euskal hiztunen ahalduntzea lantzeko, espazio kolektiboa sortzea” du helburu iniziatiba honek: “Izan ere, euskaraz bizi nahi duten herritar askok antzeko egoerak bizi dituzte sarri: hizkuntza-ohiturak mantentzeko zailtasunak, deseroso sentiarazten dituzten egoerak, erdarara jotzeko inertziak, euskaraz aritzeko zilegitasun falta…”.
Hilaren 2an Idurre Eskisabelek emandako hitzaldiaren irudia.
