Ordutegi aldaketa kirol instalazioetan
Datorren astelehenean, hilaren 15ean, hasiko da udako denboraldia Fanderiako eta Beraungo udal igerilekuetan, eta irailaren 6ra arte izango da indarrean.
Beraungo igerilekuaHerri Bizia Datorren astelehenean, hilaren 15ean, hasiko da udako denboraldia Fanderiako eta Beraungo udal igerilekuetan, eta irailaren 6ra arte izango da indarrean. Errenteria-Oreretako udal kirol instalazioetan abonaturik dauden bazkideek bi instalazio horietarako sarrera abonamenduaren barne dute. Era berean, instalazioetara sartu ahal izango da eguneko sarrerekin, 5 sarrerako bonuekin, eta udako denboraldian bi instalazioetara sartzeko aukera ematen duten bonu bereziekin.
Aurreko denboraldian izandako erabiltzaileen datua eman du udalak: 2025 denboraldian, 32.937 pertsona sartu ziren Beraunera eta 57.402 Fanderiako igerilekuetara.
Beraungo igerilekuaren ordutegia hilaren 15etik abuztuaren 31ra (biak barne) 10:30etik 21:00etara eta irailaren 1etik 6ra (biak barne) 10:30etik 20:30era. Uztailaren 22an instalazioa itxita egongo da herriko jaiak direla eta. Fanderiako igerilekuen ordutegia ere aldatu egingo da udan, eta 9:00etatik 22:00etara izango da zabalik asteko egun guztietan, igande eta jai-egunetan barne. Bestalde, Galtzarabordako Kiroldegiko igandeetako ordutegia 8:00etatik 14:00etara izango da hilaren 21etik irailaren 6ra arte, biak barne.
Errenteriako Udalak gogorarazi du, bestalde, Fanderiako Udal Igerilekuak “igerileku estali gabe” gisa funtzionatzen duela udako denboraldian, Erabilera Kolektiboko Igerilekuen Osasun Araudiaren arabera (32/2003 Dekretua, 2003ko maiatzaren 8ko EHAA). Lege-araudi horrek ez du baimentzen igerilekuak “estalita” eta “estali gabe” aldi berean funtzionatzea. Besteak beste, igerileku estaliek hainbat parametro bete behar dituzte (uraren tenperatura, giroko hezetasuna…), eta horiek ez dira mantentzen estali gabeko igerilekuetan. Beraz, udako denboraldian Fanderiako igerilekuan (Beraungo igerilekuan bezala), ura eta giro-tenperatura ez dira klimatizatzen, giro-tenperaturan mantentzen dira.
Informazio gehiago nahi izanez gero, Fanderiako instalazioetako (943 344 423) eta Beraungo Igerilekuetako (943 449 698) harreretan eska daiteke.
