Larunbatean, Lezoren ikuskizuna: 'Herri harri irri'
"Ahaztezina izango den gaua" iragarri dute lezoarren elkarlanetik sortutako ikuskizunaren sustatzaileek.
Ikuskizunaren kartela. Larunbat gaua berezia izango da Lezon. Herri harri irri ikuskizunaren agertoki izango da Gurutze Santuaren plaza 22:00etatik aurrera. Ekitaldiak herriko hainbat talde eta gonbidatu berezi bilduko ditu agertokian, “ahaztezina izango den gau batean”. Hala, kultur proiektuaren sustatzaileek adierazi dute plaza herriko kulturaren eta emozioaren erdigune bihurtuko dela, “ekitaldiak emozioaren eta partekatutako nortasunaren bidez ikusleekin konektatzeko konpromisoa hartzen du, herriko elkarte eta kultura sare bizia islatuz”.
Lezoarren bihotzetik jaiotako ikuskizuna da Herri harri irri , hala zehaztu dute horren arduradun direnek. Lezoarren erraietatik sortutako egitasmoa parte hartuko duten pertsona guztien lan eskerga, ahalegina eta ilusio itzelagatik nabarmentzen da; izan ere, denbora asko daramate prestatzen ikusleei gaualdi paregabe bat eskaintzeko. “Ikuskizunak herriko hainbat talderen eta gonbidatu berezien parte-hartzea izango du, tradizioa, musika eta herria uztartzen dituen mosaiko artistiko bat sortuz”, esan dute antolatzaileek.
Partaideak
Tomas Garbizu Lezoko Udaleko Musika Eskolako ikasleak; Murixka, Zubitxo eta Aitona-Amonen Borda dantza taldeetako kideak; Sutargi abesbatza; Enara Artola dantzaria; Iker Domingo, nahiz Mariana eta Hanna Ponochevna abeslariak; eta txalapartariak izango dira ikuskizuna egikarituko dutenak. Haiek denek hainbat musika pieza interpretatu edo dantzatuko dituzte, beste askoren artean ETSren Zurekin batera, Leonard Cohenen Halleluia, Neomaken Ilargi berriak, La Joderera taldearen bi kantu, Eñaut Elorreiatren Itzulera, edo Juantxo Zeberioren Palestinaren zauriak. Azken pieza, lezoarren ereserkia izango da: Tomas Garbizuren Lezoko herria.
Hori guztia bereziki girotua izango den Gurutze Santuaren plazan egingo dute. Beraz, Antolatzaileek dei egiten die herritarrei, bisitariei eta kulturaren zaleei Santo Kristo plaza betetzera “eta artista guztiei babesa ematera hain berezia izango den gau honetan”.
