Eguraldi ona eta uzta oparoa eskatuko dituzte
Urdiaingo kantaia erritu paganoa egingo du aurten ere Iraultza Dantza Taldeak; hilaren 23an, 22:00etan emakumeek hartuko dute Herriko Plaza.
Urdiaingo Kantaiaren bidez, eguraldi ona eta uzta oparoa eskatuko dute Iraultza Dantza taldeko dantzariek. Erritu pagano erlijiosoa da, udako solstizioarekin batera egiten zena, eta emakumeen parte hartze soilarekin. Erritu hori, udalerrira ekarriko du berriro Iraultzak, eta hilaren 23ko 22:00etan Herriko Plazan dantzatuko dute.
Duela 22 urte ekarri zuen lehenengoz Urdiaingo kantaia erritua udalerriko dantza taldeak Errenteria-Oreretara, eta ordutik urtero errepikatu du udako solstizioarekin batera.
Emakumeak, biribilean jarrita eta bi gona soinean aritzen dira; bigarren gona burura lotuta soilik aurpegia agerian utzita. 29 bertso dituen San Juan gaueko kantua abesten dute, eskuekin erritmoa jarraituta. San Juan gaua, natura, erlijioa eta uztak aipatzen dira kantuan.
Jose Mari Satrustegi etnografoak berreskuratu zuen ohitura. Iraultza Dantza Taldeari irakatsi eta 199a. urteaz geroztik, urtero egin da Errenteria-Oreretako Herriko plazan.
