24 ordu baino gehiagoz baloiari ostikoka
Jaixki Areto Futbol taldearen IV. 24 Orduko Futbito Txapelketa larunbata eta igande artean jokatuko da Bekoerrotan.
Bekoerrota kiroldegian baloi txikiari ostikoka 24 orduz, eta gehiagoz ariko dira larunbata eta igande artean (hilaren 20 eta 21 artean). Jaixki Areto Futbol taldeak IV. 24 Orduko Futbito Txapelketa antolatu du. Garai batean eta urte askoz jaso zuten Jaixkikoek Imanol Artola oroitaldiaren lekukoa, eta irmo darraite lehiaketarekin. Aurtengorako laugarrena antolatu dute.
Atzora arte zuten epea zabalik taldeek izena emateko. Gaur (hilak 19, ostirala) lehen kanporaketen zozketa egingo da 19:00etan Bekoerrota kiroldegiko tabernan. Lehiaren formatua kanporaketena da, final-hamaseirenetatik finalera.
Finale-hamaseirenetako lehen lehiak larunbateko 10:00etan hasiko dira, eta fase horretako azken partida 22:30erako aurreikusi dute. Ondoren, 23:20etik igande goizaldeko 05:10ak arte jokatuko dira final-laurdenak. Horietan irabazle izan direnek igandeko 06:00etan ekingo diete final-laurdenei, eta horko garaileek 09:20an eta 10:10an izango dituzte finalerdietako neurketak. Finala, igandeko 13:00etan.
Kantxan gertatzen denaz aparte, giro ederra izaten da Bekoerrota kiroldegian txapelketa bitartean. Jaixkik herritarrei gonbita egin die gustuko duten talde animatzera joateaz gain, giroa gozatzera joateko.
