Protokoloak berrikusi, gertatua ikertu eta ardura politikoak argitzea nahi du PSE-EEk
Barne ikerketa zabaltzea "ezinbestekoa" jo dute sozialistek "gertatutakoa argitzeko".
Joxepa Antoni Aranbarri Anitzenean du egoitza Lau Haizetara Euskaltzaleon Topaguneak Ezohiko batzordea egin zuten atzo Errenteriako Udalean azken asteotan argitara atera diren eraso matxisten auzien bueltan. Horrekin lotuta prentsa oharra helarazi du PSE-EEk. Batzorde horrek “gainbegiratze, protokolo eta gardentasun” akats larriak jarri ditu agerian sozialisten aburuz, Bertso Eskola eta Kukairen auzietan: “Hori horrela, ezinbestekoa jotzen dugu udal protokoloak berrikustea, gertatutakoa ikertzea eta ardura politikoak argitzea udal gobernuak berak aitortu baitu akatsak egin direla”.
Halaber, bi auzietan oraindik ere “gertatutakoaren gaineko inkognita handiak” daudela esan du: “Beharrezkoa da barne ikerketa bat zabaldu eta gertatutakoa argitzea”.
Batzordeak “hausnarketa zabalago bat irekitzeko” balio izan duela ere esan du alderdi sozialistak, “gisa honetako gertakarien gainean erakundeen jarrera zein izan behar duen gogoetatzeko. Akonpainamendua, entzutea eta erreparazioa garrantzitsuak badira ere biktimentzat tresna horiek ezin dutela erakunde publikoei zein epaitegiei dagokien ardura ordeztu defenditu du: “Adingabez ari garenean, bortxa sexualaz ari garenean, sozialki, kulturalki edo heziketa arloan erreferentzialtasuna duten pertsonez ari garenean, auziak pribatua izateari uzten dio. Erakundeek gainbegiratu, ekiteko, babestu eta kontuak emateko ardura dute”.
