Ikasleak itsas hondakinen erronkan murgildu ditu Materrek zortzigarrenez
Itsas hondakinen erronka: gazteak aldaketaren protagonista egitasmoaren barruan, ikasleek hamar proiektu garatu dituzte. Horietako bi eskualdekoak dira.
2018an Materrek DBHko ikasleei bideratutako egitasmo berritzaile bat jarri zuen martxan: Itsas hondakinen erronka: gazteak aldaketaren protagonista. Iniziatiba horren helburu nagusia da ikasleak ahalduntzea, tokian tokiko esku hartze propioak diseinatu, kudeatu eta gauza ditzaten, hondakinen prebentzioaren eta haien komunitateko ingurumen zaintzan eragile aktibo bihurtuz.
Zortzi urteko ibilbidean programak 2.709 ikasleren parte hartzea izan duela jakinarazi du Materrek. Pasaian, Lezon, Errenteria-Oreretan, Donostian, Tolosan, Mutrikun eta Astigarragan “hobekuntza zuzenak” ekarri dituzten 587 proiektu lankidetzan sortu direla baietsi du eragile pasaitarrak.
2025-2026 ikasturtean bost ikastetxetako 300 ikaslek hartu dute beregain itsas hondakinen erronka, eta tokiko ekintzarako 56 proposamen landu dituzte. “Proiektuak beren udalerrietako ekosistema sozialaren inplikazio zuzena lortzeagatik” nabarmendu direla zehaztu du Materrek, udalekin, saltokiekin, ostalaritzarekin, kirol erakundeekin edota kultura sortzaileekin lankidetza estuan aritu baitira. Horrez gain, komunikazio ahalegina ere “bikaina” izan dela gaineratu du eragile pasaitarrak, film laburren, webguneen, afixen eta herriko aldizkarien bidez jardun baitira.
Euskal Herriko Unibertsitatea, Plentziako Itsas Estazioa, AZTI, Kutxa Fundazioa, Surfrider Foundation eta EKOMODO bezalako ikerketa zientifikoen eta ingurumen hezkuntzan erreferente diren erakundeek osatutako ebaluazio batzorde batek, “edizio honetako hamar egitasmo berritzaileenak eta eraginkorrenak” hautatu ditu, aurkeztutako proposamenen “kalitate eta originaltasun handia” kontuan hartuta.
Bukaerako ekitaldia iragan ostiralean egin zen, Pasaiako Lonjako ekitaldi aretoan. Bertan izan ziren ikasleak, familiak, irakasleak eta udal ordezkariak proiektuaren emaitzak partekatzeko. Gazte sarituek, gainera, Mater ontzian itsasoratu ziren, Kantauri itsasoko uretan itsas hondakinak arrantzatzeari eta karakterizatzeari buruzko jardunaldi bat egiteko.
Aurtengo ekitaldian eskualdeko bi proiektu saritu dira, Donibanen eta Lezon. Donibanen Salba Sare proiektua garatu dute ikasleek, Santiago plazako barandan babes sare bat jartzeko eta haizeak eramandako hondakinak itsasora erori baino lehen harrapatzeko. Ekintza osatzeko, sentsibilizazio pankarta bat margotu zuten herriko ludotekaren ondoan.
Lezori dagokionean, hamaiketakorako bilgarri berrerabilgarrien gaineko proiektu bat proposatu dute. Lezoarren xedea da hamaiketakoen ogitartekoetarako bilgarri jasangarri eta iragazgaitzak diseinatzea, emandako kamiseta zaharretatik abiatuta. Lezo Institutuko ikasleek Herri Eskolako Lehen Hezkuntzako 4. Mailako ikasleekin prestakuntza tailer bat egin zuten, ohitura jasangarriak haurtzarotik transmititzeko.
Donibaneko eta Lezoko proiektuez gain, Astigarragan bi garatu dituzte, eta Tolosan sei.
