Lehen asteburuan, lanak bikain Hibaikak
Asteburuan jokatu ditu KAE1 Ligak denboraldiko lehen bi estropadak Astilleron (Kantabria, Espainia) eta Pasaiako Badian, eta Hibaikak bikain egin ditu lanak.
Hibaikaren Senior Gizonak Astilleroko (Kantabria, Espainia) estropadanLiher Saiz Zarate Asteburuan jokatu ditu KAE1 Ligak denboraldiko lehen bi estropadak Astilleron (Kantabria, Espainia) eta Pasaiako Badian, eta Hibaikak bikain egin ditu lanak. Larunbat arratsaldeko estropadan, erlojupekoa, hamargarren sailkatu ziren, 22:13,60 denbora eginda—12 ontzi ari dira KAE1 Ligan aurten— Orio B eta Arkoteren aurretik. Astilleroko estropadan talde guztiek egindako denborak ikusteko, klik egin hemen.
Atzoko estropadan, Pasaiako Badian, urrats bat gora egin zuten Hibaikako Gizon Seniorrek zortzigarren sailkatuta. Estropadak hiru txandako lau kaleetara behar bazuen ere, arazo teknikoengatik erlojupekoa izan zen azkenean. Hasiera hasieratik indartsu atera zen Dani Cobjucek entrenatzen duen taldea, eta eroso irabazi zuen bere txanda oso exijentea izan zen estropadan. Izan ere, sei luze eta bost ziaboga egin behar izan zituzten traineruek. Txandako laukoaren buru Hibaikakoak Kaiku, Orio B, eta Arkoteren aurretik, eta haiekiko 7 segundo, 35 segundo, eta 50 segundoko abantaila lortuta, hurrenez hurren. Horrek dagoeneko bederatzigarren postuan kokatu zituen Madalen ontzikoak, baina Astillero lehiatik kanpo gelditu zen egin zuen akats bategatik, eta postu bat gora egin zuten errenteriarrek eta zortzigarren sailkatu.
Iaz lortu zuen Hibaikaren Senior Gizonen ontziak KAE1 Ligara igotzea, denboraldi bikaina eginda eta hiru bandera irabazita. Aurtengoa KAE1 Ligan sendotzeko denboraldia dute eta horretarako, arrisku postuak hasiera-hasieratik ekiditea jarri du helburu Cobjucek, azken bi postuetan ez sailkatzea, alegia. Lehen asteburua, lanak ongi beteta, eta notarekin gainera, osatu dute Hibaikako arraunlariek; bide horri eustea dagokie orain, baino sentsazioak, bederen, lehen bi estropadak eginda, onak dira oso.
Sailkapen orokorrean, bederatzigarren postuan dira errenteriarrak 8 punturekin Kaikurekin berdinduta—hamargarrena da bizkaitarra— Orio B (5 puntu) eta Arkoteren (3 Puntu) aurretik.
Hurrengo hitzordua, Plentziako XXXVII. Ikurriña; larunbatean, hilaren 27an, 16:00etan. Lau kaleetara, lau luze egin beharko dituzte KAE1ko hamabi ontziek.
