'Irabazi arte' telesaila grabatu behar dutelako, aldaketak Altamiran
Ostegunean (hilaren 25ean) Irabazi arte telesailerako hainbat grabazio egingo dituzte Altamiran. Tomas Garbizu kaleko zenbait toki izango dira telesailerako agertoki.
Ostegunean (hilaren 25ean) Irabazi arte telesailerako hainbat grabazio egingo dituzte Altamira auzoan. Zehazki, Tomas Garbizu kaleko zenbait toki izango dira telesailerako agertoki. Horregatik, Lezoko Udalak azaldu du eremu horretako aparkalekuetan aldaketak izango direla, 14:30etik 00:30era arte zehazki. Trafikoan eta oinezkoen joan-etorrietan ere aldi baterako etenaldiak izango dira.
Aparkalekuen kasuan, grabaziorako beharrezkoa den azpiegitura garraiatzeko ibilgailuentzat tokiak gordeko dituzte, aipatutako ordutegian. Oinezkoen zein ibilgailuen etenaldiei dagokienez, gehienez 3 minutukoak izango direla zehaztu du udalak, eta zirkulazioaren dentsitatera egokituko dituzte etenaldirako tarte horiek.
Dena dela, Udaltzaingoak aldez aurretik inguruan seinaleak jarriko ditu informazioa emateko, eta inguruko etxebizitzetako sotoetan argibideak emateko orriak jarriko dira, bando erakoak. Herritarrek informazio gehiago behar badute edo zalantzak badituzte, dei dezatela Udaltzaingora (943 52 40 03).
Grabazioak sor ditzakeen eragozpenengatik, udalak lezoarren ulermena eta lankidetza eskatu ditu.
