Soilik udalak baimendutako suak piztu ahal izango dira gaur
Muturreko tenperaturen aurrean, udalak neurri bereziak iragarri ditu San Joan bezperako suen inguruan. Bost su baimendu eta finka pribatuetakoak debekatu dituzte.
Muturreko tenperaturen alerta meteorologikoa dela eta, Pasaiako Udalak neurri bereziak iragarri ditu San Joan bezperako suen inguruan. Udalak jakinarazi du soilik haiek baimendutako suak piztu ahal izango direla gaur; hortaz, debekatua egongo da finka pribatuetan suak piztea. Udaltzaingoak debeku horiek zaintzeko eta kontrolatzeko lanak indartuko ditu gaur, eta hiri eremuetan soilik egin ahal izango diren su publikoen segurtasun neurriak ere indartuko dituzte.
Honakoak dira udalak baimendu dituen bost suak:
- Antxo: Biteri plazan, Alkartasuna Euskal Dantza Taldeak antolatuta, 22:30ean.
- Donibane: Santiago plazan, jai batzordeak antolatuta eta Lintxua Dantza Taldearen ikuskizunarekin, 22:00etan.
- San Pedro: Torreatzen, jai batzordeak antolatuta eta Lamiak Dantza Taldearen ikuskizunarekin, 22:00etan.
- Trintxerpe: Euskadi etorbidean Illunbe Musika Elkarteak sua piztu eta dantzatuko du, 20:00etan. Ondoren, 22:15ean, Euskadi etorbidean Ekaitza eta Famak antolatuta, sua piztu eta desioak erreko dituzte.
Prebentzio neurriak
Baimendutako suak aurrera eramateko, prebentzio neurriak bermatu behar direla jakinarazi du udalak:
- Sua eraikinetik, ibilgailuetatik, aireko kable elektrikoetatik edo landare altuetatik urrun kokatu behar da, pilatutako materialaren altuera baino bost bider handiagoa den distantziara. Ingurua material erregairik gabe mantendu behar da, eta haize oso indartsua badago, sua bertan behera uztea baloratu behar da.
- Sua piztuta dagoen bitartean ez da likido sukoirik (alkohola edo gasolina) erabili behar. Ez bota sutara zein ingurura pirotekniarik, sprayrik, latarik, gurpilik edo plastikorik, ke toxikoak sor baititzakete.
- Sutatik gertu ur mahuka bat edo su itzalgailuak izatea gomendatzen da.
- Bukatutakoan, ziurtatu txingor eta errauts guztiak erabat itzaltzen direla, ura, harea edo lurra erabiliz.
Aldaketak trafikoan
San Joan suek aldaketak eragingo dituzte Donibaneko eta Trintxerpeko trafikoan. Barruti arrosan jaiak dira, sanjoanak ospatuko baitituzte gaurtik aurrera. Festengatik, kale zaharra itxi egingo da gaurko 17:00etatik aurrera eta ekitaldiak bukatu arte. Horrez gain, kale zaharra ere itxita egongo da bihar (asteazkena) 09:00etatik aurrera eta ekitaldiak bukatu arte.
Trintxerperi dagokionean, Euskadi etorbidea itxi egingo da gaurko 20:00etatik 00:00etara. Autobusak portutik sartu eta aterako dira, eta zerbitzua eta maiztasunak mantenduko dituzte. Hospitalilloko eremuan, gainera, geltoki bat gaituko da, Euskadi etorbideko geltokiak ordezteko.
