Topoa Gaintxurizketan beti geldi dadila eskatu du Lezoko Udalak
Eskaera Mugikortasun Jasangarriko Sailari egin dio udalak. Topoa bertatik 15 minutuero pasa arren, 30ero egiten du geldialdia.
Topoak beti Gaintxurizketan geldialdia egin dezala nahi du Lezoko Udalak. Bertatik 15 minutuero pasatzen dira trenak, bai Hendaiarako noranzkoan zein Donostiaranzkoan. 30 minutuan behin gelditzen dira bertan, ordea, jendea hartu edo uzteko. Bitik batek egiten du geldialdia Lezoko geltokian. “Bertan trena hartu edo bertara trenez iritsi nahi duten pertsonek ez dute Euskotrenen zerbitzu osoa erabiltzeko aukerarik”, azaldu du udalak.
Eskaera gutun bidez helarazi zion gaian ardura duen erakundeari, Eusko Jaurlaritzako Mugikortasun Sailari. “Sailburuaren erantzuna ezezkoa izan zen, nahiz eta ez zuen inolako argudio teknikotik azaldu”, zehaztu du udalak. Hala, udalak oroitarazi du inguru horretan bai udalak zein aldundiak lanak egin dituztela mugikortasuna eta irisgarritasuna hobetzeko, tartean, geltoki horretara auzotarrak eta langileak hara seguru iristeko azpiegitura osatu delarik. Topoaren maiztasunak, ordea, egindako horiekin talka egiten duela uste du Mikel Arruti alkateak: “Tren geltokitik dagoeneko pasatzen diren tren guztiek geldialdia egingo balute, maiztasuna 15 minutura jaitsiz, herritarrek garraio publikoa erabiltzeko eta, hortaz, mugikortasun jasangarria sustatzeko aukera gehiago izango lukete eta hori denontzat da onuragarria”.
Gaiari soluzioa emate aldera erakundeen arteko elkarlanaren aldeko jarrerari eutsiko diola azaldu du udalak, eta zehazki Mugikortasun Jasangarriko Sailarekin hartu-emana egiten ahaleginduko dela.
