'Arroxa euskaraz gara', euskararen aldeko palakadak
Euskararen aldeko aldarria eta deialdia egin zuten atzo arratsaldean Donibaneko Santiago plazan, sanjoanak hasi aurretik. 'Arroxa euskaraz gara' izenburupeko herri agerraldia egin zuten sanjuandarrek.
Euskararen aldeko aldarria eta deialdia egin zuten atzo arratsaldean Donibaneko Santiago plazan, sanjoanak hasi aurretik. Arroxa euskaraz gara izenburupeko herri agerraldia egin zuten sanjuandarrek. “Donibanen bide bat abiatu dugu”, esan zuen atzo agerraldian Nerea Itxausti kazetari sanjuandarrak: “Euskararen biziberritzeak herrian dituen erronkei heltzeko euskaltzaleon saretze prozesua irekita dugu; euskaraz bizitzeko hautua sustatzeko, arnasguneak hauspotzeko, eta herri nortasuna euskararekin lotzeko”. Herri nortasunaren ikur da arrauna Donibanen. Horregatik, barrutiko euskaltzaleen mugimenduak badu ezinbesteko konplize bat: San Juan-Koxtape Arraun Elkartea. Horregatik izan ziren atzoko agerraldian klubeko arraunlari, entrenatzaile eta zuzendaritzako kideak, herritarrekin batera. Zapi arrosa jantzi zuten denek, Arroxa euskara gara leloduna. Sanjuandar izatearen muinean euskarak ezinbesteko presentzia baitu.
Sanjuandarren euskararekiko kezka ez da haiena bakarrik. Testuinguru orokor bat du. “Euskara eta euskal hiztun komunitatea larrialdi linguistiko egoeran gaudela behin eta berriz entzuten ari gara. Datu soziolinguistikoek, eguneroko bizipenek eta azken urteetako joerek argi erakusten digute. Erabilera apaltzen ari da eta eskubideak kolokan jartzen. Globalizazio homogeneizatzaileak hizkuntza nagusiak indartzen ditu, eta minorizatuak ahultzen. Ez da garairik errazena, baina badakigu bidea zein den: euskara eskubidea dela jabetzea, euskaraz aritzeko baldintzak aldarrikatu eta bultzatzea, eta, minorizazio egoerari aurre egingo dion komunitate euskaltzalea zabaldu, saretu eta ahalduntzea”, azaldu zuen Intxaustik.
Klubaren izenean Joseba Fernandezek hartu zuen hitza. Azaldu zuen San Juan-Koxtapen behar horiez jabetu direla, eta ibilbide bati ekitea erabaki dutela. “Herrian errotutako elkartea garela ulertzen dugu; arraun-zale askoren erreferente eta herriaren erakusleiho ere bai. Gure nortasuna euskarari lotuta sentitzen dugu eta herriko kolorea eramateak ardura bat dakar”. Zentzu horretan, klubean epe ertainerako lanketarekin hasi direla azaldu zuen Fernandezek, kluba euskararen arnasgune izatea izango da lanketa horren emaitza. Hori lortzeko, hizkuntza ohituretan eragiteko eta erabilera aktibatzeko neurriak hartzeko konpromisoari heldu diotela nabarmendu zuen prestatzaileak.
“Badakigu Klubean dauden hizkuntza-portaerak gizartearen isla direla, euskararen kaleko errealitatea erreproduzitzen dela bertan. Horrek ezin gaitu erlaxatu, baina euskarak behar duen bultzada denon artean eta bakoitzak beretik eman beharra dugu”, Fernandezek.
Hiru eskaera
Arraun elkartearen testuingurutik harago, herrira begirako dinamikaren ardatzen berri eman zuen Itxaustik, euskarak behar duen pizkundea herrian sortzeko. “Izan ere, Pasai Donibane herri euskalduna al da? Eta euskarak behar duen pizkundea herrian sortzeko, zer astinduko du gutako bakoitzak? Arroxa euskaraz gara”.
Honakoak dira dinamika horren hiru ardatzak, hitzez hitz:
- Herri nortasuna, harrotasuna eta kolorea atxiki diezaiogun gure hizkuntzari.
- Donibaneko herritarrok euskara erabiltzeko erabakia geure egin dezagun: lehen hitza
(eta bigarrena) euskaraz beti, eta hirugarrenetik aurrera ahal den guztietan. - Herriko elkarte eta eragileak, Koxtapek egin bezala, besteak beste, gehitu daitezela
euskararen erabilera indartzeko eta ziurtatzeko lanketa egitera.
Segidan, agerraldiaren hainbat unerekin argazkiak eta bideoa.
