Sanjoanak eta giroa, bero
Atzo hasi ziren 2026eko Donibaneko San Joan festak. Gaurko haurren danborrada bertan behera gelditu da, beroagatik.
Oso bero hasi ziren atzo Donibaneko 2026eko San Joan Festak. Santiago plazan zentratu ziren hasierako ekitaldiak; termometroak 35 gradu ezarrita zituen bere zenbakitegian 19:30ean hasierako txupina bota zenerako. Saltsa zen plazan, nabaria zen egun berezia izango zela. Gaua ere bai, San Joan suaren barruko Aurreskua egin zelako plazan bertan gauez aurretik izan ziren jardueren ondoren. Bero hala ere. Horregatik, beroagatik alerta ezarria dagoelako, gaurko (hilak 24, asteazkena) 11:00etatik egitekoa zen haurren danborrada bertan behera gelditu dela jakinarazi zuten atzo Donibaneko Jai Batzordeko kideek. Gaurkoa San Joan Eguna da, gordetzeko eguna Pasaian.
19:30eko festen hasierako ekitaldi ofizialaren aurretik, ordea, Arroxa euskaraz gara herri agerraldia egin zen plazan bertan, Donibaneko Euskaltzaleen Sareak eta San Juan-Koxtapek deituta. Hedabide honek gaurko egunean zehar (hilak 24) emango du bertan izandakoen berri.
Txupinazoa eta ikurrinaren igoera Naroa Torres Martin eta Zura Sistiaga Los Santosen eskutik izan zen; joan den urteko txupineroek jarri zizkieten zapi arrosak lepoan, Enara Escribano Camarak eta Julen Baquero Salaberriak hain zuzen ere. Aurretik, San Joan egunaren bezperaren esanahiaz eta festak ondo pasatzeko desioa azalduz hizketaldia egin zuten herriko gazteenek, eta horri guztiari bertso bidez eman zioten bukaera herriko haurrek. Jarraian, Lintxua Dantza Taldekoen Agurra-rekin, hasi ziren ofizialki sanjoanak.
Gaurko danborrada bertan behera utzita, berez ez oso luzea zen egitaraua kamustuta gelditu da. Honakoak dira 2026ko sanjoanen egitarauaren barruan datozen ordu-egunetan egingo direnak.
Gaur (hilak 24, asteazkena)
- 11:30: San Joan eguneko meza eta ondoren hamaiketakoa.
- 17:00: Txokolatada, jolasak eta buruhandiak Santiago plazan. Ondoren, apara festa.
Hilak 27 (larunbata)
- 20:00: Tu-k taldearen kontzertua Kultur Aterpean.
Segidan, atzoko hasiera ekitaldiaren bideoa eta argazki sorta.
