De Cyne Reyna, zabalik berriro
Bihar irekiera ekitaldia egingo dute eta larunbaterako txaranga eta arratsaldepasa antolatu dituzte.
De Cyne Reyna barruko horma irudi bat. Irekiera ekitaldia egingo du bihar —ostirala—arratsaldean De Cyne Reynak. Haren sortzaile eta arima hamarkadetan izan diren Fernan Cuellar Perez de Azpillagak, Txomin Abad Mayoralek eta Txema Moares Bengoetxeak erretiroa hartuta, herritar talde batek hartu du lekukoa. Hilabete honen lehenengo eguna izan zen hirurentzat azkena lanean Reynan, eta lekukoa hartu dutenek, bihar zabalduko dituzte taberna mitikoaren ateak berriro.
19:00etan izango da hori, eta ekitaldi xume baten bidez, Reynaren bueltan ibili direnak, lagunak, gertukoak elkartu eta jatekoa eta edatekoa izango dute; hitz egin eta proiektuari segida emango diotenekin iritziak partekatzeko beta ere izango dute biharko juntadizo horretan. 20:00etatik aurrera taberna izango da Reyna, haren ardura hartu dutenek kultur elkartea eratuko badute ere. Eskaintza kulturalaz arduratuko dira horiek, eta udazkenean hasiko dute bide hori.
Tabernaren ardura Iñaki Iglesias Imazek hartuko du bihartik, ezinbesteko lantalde profesionalak lagunduta.
Kultur agenda, udazkenarekin batera helduko da De Cyne Reynara, baina aurretik, larunbatean bertan bi ekitaldi berezi antolatu dituzte espazio horretan. Lehena goizez, 12:00eatik aurrera Gautxori txarangak girotuko du Reyna; arratsaldez, berriz, arratsaldepasa antolatu dute Iker Rodriguez DJaren eskutik, 17:59an hasita.
Jendea bertaratu eta antolatutakoez zein espazioaz gozatzera deitu dute.
