Ibaiondo txukuntzeko auzolanera deitu dute
Sasoian zehar asko izan dira bertan, herriko eragileen ekimenez, egin diren jarduerak. Kurtsoa bukatzear dela datorrenerako prest utzi nahi dute.
Ikasturtearen barruko jarduerak bukatzear dira toki askotan. Horietako bat da Lezoko Ibaiondo. Sasoian zehar asko izan dira bertan, herriko eragileen ekimenez, egin diren jarduerak, eta orain kurtsoa bukatzear dela datorrenerako prest utzi nahi dute. “Kurtso mugitua izan da, Ibaiondo asko erabili da”, zehaztu dute Sortuko kideek. Beraz, herriko eragileen etxe den eraikina txukuntzeko auzolanera deitu dituzte bertako erabiltzaileak, eta herritarrak: uztailaren 4rako deitu dute.
Egun horretako 08:00etan gelditzeko deialdia egin dute espazioa kudeatzen dutenek; 12:00ak artean aurreikusi dute auzolanerako tartea. Ondoren, mokadutxoa emango diete lanean izan diren denei. Ibaiondo erabili duen eragile bakoitzetik gutxienez pertsona bat joatea komeni dela adierazi dute Sortutik.
