Garrantzitsua da ondo hastea
Euskotren eta Eusko Label ligetako lehen estropadetan dezenteko emaitzak lortu dituzte 'Batelerak' eta 'Erreka' traineruek.
Arraunlari sanjuandarrak, igandean Madrilen.Jose A. Rodriguez Hasierak beti izaten dira zailak, horregatik, ondo hastea garrantzitsua da. Hala egin zuten atzo San Juanen bi traineruek Madrilgo Buitrago de Lozoyako urtegian. Batelerak trainerua laugarren izan zen, eta Erreka, berriz, zazpigarren. Aurreikusitakotik hurbil izan ziren bi ontziak; agian, emakumeena esperotakoa baino hobexeago, eta gizonena bere mailatik gertu, baina beharbada, hobetzeko tartea duenaren sentsazioarekin. Hortaz, datorren larunbateko Bilboko erlojuopekoan Euskotren Ligako ohorezko txandan izango dira Batelerak trainerukoak, eta Erreka-koak bigarrenean.
Ezohiko hasiera izan dute goi mailako bi liga horiek. Batetik, estropada Kantauri itsasotik kanpo egin zelako; bestetik, eremua bera ere urtegi horren baldintzetara egokitu zelako binakako lehien bitartez, eta ohikoak diren ziabogen kopurua gaindituz. Ondo moldatu ziren arrosak, ordea, berritasun horietara. Ez ziren banderen borrokan izan, baina ondo lehiatu ziren beti atzean hainbat traineru utzita.
Atzokoaren beste ondorioren bat atera behar balitz, honakoa izan daiteke bat: bai emakumeen zein gizonen traineruek, gora-behera, badakite nor izango den haien aurkari zuzen aurtengo ligetan. Baina hasieran besterik ez dira liga horiek, eta ondorio horiek astetik astera beste helburu batzuetara bidera daitezke.
Datozen bi estropadak datorren asteburuan izango dituzte arrosen bi traineruek, larunbat arratsaldean Bilboko Bandera, eta igande goizean Zierbenako Petronor bandera. Madrilen ereindakoa berretsi behar dute han sanjuandarrek.
