Itsas hondakinen arazoa eta prebentzioa lehen lerroan jarriko ditu Materrek
Ostegunean Zero Zabor Uretan kanpainaren zazpigarren ekitaldia abiatuko du Materrek Bilbon. Itsas zeharkaldi bat da, eta euskal kostaldeko zortzi portutan izango dira, jarduerak eginez. Pasaian uztailaren 22tik 24ra izango dira.
Ostegunean (uztailaren 2an) hasiko da Mater Ontzi Museo Ekoaktiboak sustatzen duen Zero Zabor Uretan kanpainaren zazpigarren ekitaldia. Materreko kideak Euskal kostaldeko hainbat portutan izango dira uztaila osoan zehar, Hondakin onena, sortzen ez dena lelopean. Eragile pasaitarrak bultzatzen duen iniziatibaren helburua da “herritarrak itsas hondakinen arazoaz kontzientziatzea eta prebentzioan inplikatzea”.
Tokikotik abiatuz, globala den arazoari aurre egin eta haren irtenbideei erantzuna eman nahi die Materrek, sinergiak bilatuz. Uztailean zehar itsaso osasuntsu batan aldeko itsas zeharkaldia egingo dute Materreko kideek, eta geldialdiak egingo dituzte Bilbon, Portugaleten, Bermeon, Ondarroan, Mutrikun, Getarian, Hondarribian eta Pasaian, udalerri horietan hainbat jarduera eginez.
Materreko kideak komunitatean sortutako bi erraldoirekin izango da aipatutako udalerrietako portuetan: Bio eta Zabor. Bio bizitzaren sarea da, eta bizidunak zaintzearen garrantzia adierazten du. Zabor, aldiz, itsas hondakinen munstroa da, gizartearen kontsumo ohitura suntsitzaileen emaitza.
Itsasoko zaborraren %80 “lehorreko hondakinen egungo kudeaketatik eta gizartearen kontzientziazio eta konpromiso faltatik” datorrela jakinarazi du Materrek. Zero Zabor Uretan egitasmoaren asmoa da “hondakinen arazoa ikusaraztea eta horien murrizketa sustatzen duten ohituren aldaketa ahalbidetzea”, hausnarketarako eta konponbideak bilatzeko prozesu parte hartzaile bat sortuz.
Kanpainan parte hartzen duten udalerrietan jarduera doako eta irekiak antolatuko dira datozen egunetan. Hauxe da Materren itsas zeharkaldiaren egitaraua:
- Bilbo: Uztailaren 2tik 4ra.
- Portugalete: Uztailaren 4tik 7ra.
- Bermeo: Uztailaren 7tik 10era.
- Ondarroa: Uztailaren 10etik 13ra.
- Mutriku: Uztailaren 13tik 16ra.
- Getaria: Uztailaren 16tik 19ra.
- Hondarribia: Uztailaren 19tik 22ra.
- Pasaia: Uztailaren 22tik 24ra.
Euskal kostaldeak, Zero Zabor Uretan iniziatibaren bitartez, plastikozko kutsaduraren aurkako nazioarteko hilabetearekin egingo du bat, Plastic Free July izeneko kanpainarekin. Herri bakoitzean, gainera, publiko guztiei begirako jarduera doako, ireki eta parte hartzaileak egingo dituzte Materreko kideek. Horietan parte hartzeko beharrezkoa da aurretiko erreserbak egitea 619 81 42 25 telefonoan edo helbide elektroniko bidez. Jarduera horiek itsasoko hondakinen arazoa “modu didaktiko eta atseginean” ezagutzeko, parte hartzeko eta konpontzeko aukera emango dute.
Zeharkaldia Bilbon hasi ondoren, Pasaian bukatuko da, etxean, eta gainontzeko udalerrietan bezala, Materrek hainbat jarduera egingo ditu badian, uztailaren 22tik 24ra bitartean. Hona hemen Pasaiako egitarau osoa egunez egun:
Zero Zabor Uretan Pasaia
Uztailak 22, asteazkena
- 19:00-20:00: Itsas erraldoien martxa.
- 22:30-23:30: Urpeko zinema ontzian.
Uztailak 23, osteguna
- 11:00-14:00 eta 17:00-20:00: Itsas zaindari gunea.
- 11:00-14:00 eta 17:00-20:00: Bisitak ontzi museora.
- 17:00-19:00: Hondakin bilketa Mater parean.
Uztailak 24, ostirala
- 11:00-14:00: Itsas zaindari gunea.
- 12:00-14:00: Bisitak ontzi museora.
- 17:30-19:00: Sormen birziklatze tailerra.
- 19:00-20:30: Zero Zabor Uretan topaketa.
