Hondakinetan tarifikazio berria
Errefusa tratatzearen kostuak gora egin du, eta biohondakinenak nabarmen behera; herritarren portaera kolektiboak erabakiko du zenbat ordaindu beharko duen hondakinen trataeragatik udalerriak.
Eñaut Gracia, Yolanda Martin eta Bernar Lemos zinegotziak.Herri Bizia Tarifikazio berria jarriko du martxan aurki Gipuzkoako Hondakinen Kontsorzioak, eta horren arabera, errefusa tratatzearen kostua tonako 222 euro izatetik, 232 eurora pasako da; biohondakinen tratamendua berriz, nabarmen jaitsiko da tonako 178 eurotik 99 eurora pasako baita. Aldaketa kuantitatibo handia dakar neurriak, herri bakoitzak bere hondakinen kudeaketaren eta lortzen duen bilketa mailen ardura hartuko baitu bere gain. Hondakinak behar bezala kudeatzen dituzten udalerriek saria jasoko dute, eta emaitza positiborik lortzen ez dutenek, berriz, gehiago ordaindu beharko dute.
Tarifikazio berriak zuzenean interpelatuko dituela herritarrak adierazi du udalak, “portaera kolektiboak erabakiko baitu zenbat ordaindu beharko duen Errenteriak bere hondakinen kudeaketarengatik”. Hori horrela jardunbide egokiek, hondakin gutxiago sortzeak eta dagokien edukiontzietan birziklatzeak eragin zuzena izango du udalerriek kontsortzioari egin ebhar dioten ekarpenean.
Hondakinak bereiztea eta biriziklatzea hobetzeko beharrarekin jabetuta hainbat urrats egin ditu udalak. Besteak beste, errefusaren eta organikoaren kudeaketak duen kostuari buruzko informazio kanpaina egin zuen abenduan. Horrez gain, Garbera eta Oiartzungo garbiguneak erabiltzeko aukerarekin batera, minigarbiguneak instalatzeko lizitazioa martxan dela jakinarazi du udalak, “udazkenean erabilgarri izatea espero dugu, eta horrekin batera, garbigune mugikorrek ematen duten zerbitzua hobetzea ere espero dugu”. Baliabide berriak osatu egingo du totemek auzo ezberdinetan hondakin zehatzak biltzeko ematen duten zerbitzua, baita tamaina handiko hondakinak biltzeko zerbitzua ere.
Organikoari dagokionean, bi berrikuntza ezartzen ari da udala: organikoaren edukiontziak aldatzea, irisgarriagoa eta erabiltzen errazagoa den sistema batengatik, eta horrekin batera, txartel elektronikoen sistema berri bat, zerbitzua eta eskura dagoen informazioa hobetuko dituena. Sentsibilizazio eta komunikazio kanpaina egingo du bestetik, organikoaren kudeaketan ohitura onak eta erantzukizun partekatua sustatzeko. Urtea bukatu aurretik martxan egoeta espero duela bi neurri horiek adierazi du tokiko erakundeak.
Egungo joerari buelta ematea denen mesederako izango dela esan du udalak bukatzeko, “errefusa hondakinaren zati handi bat biohondakina bihurtzea guztion onurarako izango da. Udalerriarentzat kostu ekonomikoak murrizteaz gain, ingurumena babesten ere lagunduko du, gure komunitatearentzat etorkizun iraunkorragoa sustatuz”.
