Koltxoi, izara eta burukoen etxez etxeko salmentarekin lotutako zenbait jarduera ikertzen ari da Udaltzaingoa
Errenteriako Udaltzaingoak herritar guztiei, batez ere adineko pertsonei, gomendatzen die mota honetako produktuak eskaintzen dituzten saltzaileek etxera egiten duten bisiten aurrean arreta handiz jokatzeko, eskudirutan inolako ordainketarik ez egiteko akreditazio-dokumentaziorik jaso gabe, eta dokumenturik ez sinatzeko arretaz irakurri gabe.
Udaltzaingoaren bulego mugikorra iztietan Adi egoteko deia zabaldu du Udaltzaingoak. Prentsa ohar bidez, jakinarazi du ekainean jakin duela legez kontrakoak izan daitezkeen koltxoi, izara eta burukoen etxez etxeko salmentarekin lotutako zenbait jarduera egin direla. Ekaineko bigarren hamabostaldian zenbait abisu eta jakinarazpen jaso dituela azaldu du, itxuraz atez ate produktu horiek saltzen dituzten pertsonen jarduerarekin lotuta.
Orain arte duten informazioen arabera, ekintza horien biktima nagusiak adineko pertsonak izango lirateke, eta etxez etxeko saltzaile horiek beren burua osasun-arloarekin lotuta aurkeztu dezakete edo hori ulertarazi; koltxoiei edo oheko arropari egotzitako osasun-arazoak aipa ditzakete; eskainitako produktuen gainean zalantzazko egiazkotasuna duten onura eta bertuteak iragarriko lituzkete eta prezio oso altuak kobratuko lituzkete, zenbait kasutan, 1.500 euro baino gehiagoko ordainketak eskudirutan exijituko lituzkete, dokumentazio akreditatiborik eman gabe.
Udaltzaingoak dagozkion kudeaketak hasi ditu azaldutako gertaerak egiaztatu eta argitzeko, eta bide horretan jarraituko du lanean. Hori dela eta, atestatu judiziala hasi da eta hainbat pertsona ikertu da.
Errenteriako Udaltzaingoak herritar guztiei, batez ere adineko pertsonei, gomendatzen die mota honetako produktuak eskaintzen dituzten saltzaileek etxera egiten duten bisiten aurrean arreta handiz jokatzeko, eskudirutan inolako ordainketarik ez egiteko akreditazio-dokumentaziorik jaso gabe, eta dokumenturik ez sinatzeko arretaz irakurri gabe. Zalantzarik izanez gero, komeni da erosketa une horretan ez egitea eta aldez aurretik senideei edo konfiantzazko pertsonei kontsultatzea.
Era berean, jardunbide horien biktima izan dela uste duen eta oraindik abisurik eman ez duen edozein herritarrek Errenteriako Udaltzaingoan salaketa jartzeko eskubidea eta aukera du, eta bertan emango zaio behar duen informazio guztia. Masti – Loidi kalea 2 an du egoitza Udaltzaingoak eta telefonoz 943 344 343 zenbakira deitu behar da.
