Feriek aparkaleku aldaketak sortuko dituzte Trintxerpen
Karmenetako feria eremua Zirizako aparkalekuan jarriko da, eta ezin izango da bertan aparkatu hilaren 12tik. Alternatiba gisa, Rodolfoko eremua gaituko da jaietan.
Hilaren 15ean egingo dute eztanda Trintxerpeko karmenek. Udala eta jai batzordea buru-belarri ari dira festak prestatzen, eta udal erakundeak zenbait neurri hartu ditu ibilgailuen mugikortasuna eta aparkatzeko aukerak bermatzeko.
Karmenetako feria eremua Zirizako aparkalekuan jarriko da, eta ezin izango da ibilgailurik aparatu eremu horretan. Feria eremuaren muntaketa dela eta, ezin izango da Zirizan aparkatu hilaren 12ko (igandea) 12:00etatik aurrera. Alternatiba gisa, udalak portuko Rodolfo orube zaharra gaituko du igandeko 12:00etatik aurrera.
Karmenak eta garbiketa lanak bukatu ondoren, hilaren 20an berriro irekiko dute Ziriza aparkatzeko. Horrez gain, Rodolfon aparkatuta dauden ibilgailuak hilaren 20rako kendu beharko dira.
Rodolfoz gain, udalak Karmengo Ama ikastetxeko patioa eta Hospitalilloko hesien arteko eremua gaituko ditu karmenetan aparkatu ahal izateko. Datozen egunetan informazio zehatzagoa emango du udalak.
