Pantxoa eta Peio, aurtengo madalenen aurreko txistulari kontzertuko gonbidatuak
Hilaren 20an, astelehenarekin izango da emanaldia Zumardian 19:30ean hasita, eta Pantxoa eta Peiorekin batera bakarlari gonbidatu berezia ere izango da aurten, Ekain Cachenaut uztariztarra.
Madalenen aurreko txistulari kontzertua aurkeztu dute Pantxoa Carrere eta Peio Ospital, Pantxoa eta Peio izango dira aurtengo artista gonbidatuak madalenen aurreko txistulari kontzertuan. Gaur eman dute horren berri agerraldian Iñaki Queralt Coira Herri Arte Eskolako lehendakariak, eta Xabier Vesga Elizalde Udal Txistulari Taldeko zuzendariak, emanaldian parte hartuko duten hainbat eragilek lagunduta.
Hilaren 20an, astelehenarekin izango da emanaldia Zumardian 19:30ean hasita, eta Pantxoa eta Peiorekin batera bakarlari gonbidatu berezia ere izango da aurten, Ekain Cachenaut uztariztarra. Cachenaut Euskal Herriko txistu bakarlarien txapelduna izan da hiru azken urteetan. Haiekin batera izango dira Errenteriako Udal Txistulari taldea; Errenteria-Oreretako eta Euskal Herriko txistulariak; Jare Antzizar eta Julen Olaizola (bertsolariak); Ereintza Dantza Taldea; Coco Dance; Xanti eta Maialen (erraldoiak); Zaria abesbatza; Aritz Lonbide (tronpeta), Koldobika Salaberria (tronpa), Ricardo Navas (tronpeta), Txomin Ganborena (tronboia), Iñaki Albizu (tuba), Andoni Garcia (kitarra), Jose Luis Alonso (baxua), Iñaki Letamendia (bateria) eta Imanol Elizasu (teklatua). Aurkezle lanetan Garazi Urdanpilleta arituko da.
Pantxoa eta Peioren abesti esanguratsuenak joko dituzte.
Horrez gain, aurtengoan Indalezio Bizkarrondo Bilintx omenduko dute, bere heriotzaren 150. urteurrenean, berak egindako hainbat bertso abestuz.
Berritasunik ere bada; lehen aldiz madalenetako omenduari egingo zaion aitortza ere ekitaldi horretan egingo diote, Luis Mari Moreno Urretabizkaia Pirata oholtzara igoko baita, herriko kulturari, musikari eta jaietako bizitzari urte luzez egindako ekarpena aitortzeko. Ekitaldi horretan bertan banatuko dituzte aurtengo Madalenetako Kartel Lehiaketako sariak ere. Bertan jasoko dute aitortza Joseba Iñaki De la Callek eta Laia Maturanak, aurtengo kategoria orokorreko eta haurren kategoriako kartel irabazleen egileek.
